DBP’yî kesê ke 20ê Tebaxa 2016î de netîceya hêrişê DAÎŞ’î yê vera veyveyêkî de zafêrîya ci domanî 56 hemwelatîyan dinyaya xo bedilnabî û hema hema 100 hemwelatî zî dirbetin bîbî ser reyde bîn qetilkerî lanet kerdî û kesê ke weşîya xo da ey zî bi rêzdarî ardî xo vîrî.
Eşkerayîya Partîya Herêman a Demokratîke (DBP) wina ya:
“Dîlok de 20ê Tebaxa 2016î de netîceya hêrişê DAÎŞ’î yê vera veyveyêkî de zafêrîya ci domanî 56 hemwelatîyanê ma dinyaya xo bedilnaye, hema hema 100 hemwelatîyê ma dirbetin bîyî. No qetlîyam demo ke şarê ma hîna zêde nêzdîyê aştîye bîyî, hêvîya çareserîye pîl bîye de qewimîya.
Nê erdan de key ke hêvîya aştîye zîl dana, hêzê tarîyî têgêrenê; waştişê cuya şaran a têduşt, edaletwaz û azade kenê ke bi gonî asteng bikerê. Na çarçewa de Qetlîyamê Dîlokî zî berhemê hişmendîya ke Anqara, Pîrsus û Amed de qetlîyamî viraştî, yo. Ma plankerdox, êyê ke peyê qetlîyamî de yê, êyê ke sebebê ci benê û rixmê raporanê îstîxbaratî înanê ke tedbîran nêgenê, lanet kenê. Hişmendîya ke asayîşê şarî nê, hesabê dergkerdişê emrê xo yê sîyasî gonî û şerî reyde kena, nê welatî de aştîye û demokrasî rê çi hetkarîye nêkena.
Ma reyna înanê ke dinyaya xo bedilnaye, bi rêzdarîye anê xo vîrî; dejê keye û merdimanê dirbetinan pare kenê. Ma agahdar kenê ke ma do pawitişê aştîye û demokrasî ra caro fek vera medê.
Seba pawitişê cuye, pîlkerdişê aştîye têkoşînê ma do bidomîyo.”
