Hunermed Mazlum Jîna ke seba deyîrêka kurdî 22 aşmê û 15 rojê cezaya hepisxaneyî ame ci rê birnayiş, va: “Cayê 22 aşman 22 serrê ceza bidê zî, ez do bi eynî heyecan û moralê xebatanê xo bidomna.”
Hunermendê kurd û xebatkarê DBP’î Mazlum Jîna (Mazlum Akpolat) Hezîrana 2016î de seba deyîra bi nameyê “Xewna sed sala” klîb viraşt. Dima zî klîb weşan kerd, Serdozgerîya Komare ya Îstanbulî bi îdiaya “propogandaya rêxistinî” heqê Akpolatî de doz akerd. Roniştişê doze ke Mahkemeya Ceza ya Girane ya 35ine ya Edlîyeya Îstanbulî ya Çaglayane ame viraştiş de Akpolat, bi îdiaya “propogandaya rêxistinî” 22 aşmê û 15 rojê cezaya hepisxaneyî ci rê ame dayiş.
Akpolat verba qerarî bi rayîrê avûkatê xo serpiroyê Mahkemeya Îstînafî da. Peynî ke Mahkemeya Îstînafî ceza testîq kerd, Akpolat 16ê Citmenga 2019î de dosye erşawit Mahkemeya Berze ra la belê cezaya Akpolatî demo nez de hetê Mahkemeya Berze ra ame tesdîqkerdiş.
Babete ser Akpolat wina va: “Têdeyîya eserî ser kultur, ziwan, huner û xoverdayişê kurdkî ameya awankerdiş. Deyîra mi bi xususî ser ciwan, cinî, dayîk yê hepisxaneyî de yê û ê waran de xover danê bî. Têdeyîya deyîra mi bi ruhê xoverdayişî ameya nuştiş. Ma hunermendê şarê kurd ê. Hunermend komel de wayîrê rol û mîsyonî yê. Wa ma ser zehmetî, zext û şerî ke heme warê cuye de qewimyenê binusê. Ma pawitişê xo de zî na yewe ard ziwan.”
Nêzdîbîyayişo polîtîk
Akpolat da zanayiş ke ceza ke seserra 21ine de seba deyîrêka kurdkî ameya dayiş cayê xemgînî yo û wina qedîna: “Ma seba merdimîye, heqîqet û komelo azade deyîranê xo vanê. Ez şîra hepsî zî bi na raştî bizanê; demê ez hepisxaneyî ra biveja ez do xebatanê xo yê kultur û hunerê kurdkî ya welatperwer û şorişgerî hîna qewetir û bi coş bidoma. Do ez xebatanê xo ser bingeya şorişgerî, çarçiweya neteweya demokratîke de aver biba û ma do ser na esasî hereket bikerê.”
