Dewijê dewa Fisî ya qezaya Licêyî ke PKK’yî kongreya xo ya verêne uca de viraştbî, îfade kerd ke ê peyê qerarê PKK’yî yê veradayîşê çekan de yê û înan waşt ke keyeyo ke PKK’yî kongreya xo tede viraştbî bibo muze.
PKK’yî dima ke vengdayîşê “Aşîtî û Komelê Demokratîkî” yo ke Rayberê Şarê Kurdî Abdullah Ocalanî 27ê Sibate de raya pêroyî rê eşkera kerd, 1ê Adare de adirbest îlan kerd. Dima zî 5-7ê Gulane de kongreya xo viraşte. PKK’yî 12ê Gulane de qerarê kongreya xo ya tarîxî eşkere kerdî. Kongre hem rojeva Tirkîya û hem zî dinya ser o tesîrêko muhîm kerd. Dewijê dewa Fisî ya qezaya Licê ya Amedî ke PKK’yî 27ê teşrîna peyêne ya 1978î de kongreya xo ya verêne uca de viraştbî, derheqê qerarê kongreya PKK’yî de qisey kerd û waşt ke Rayberê Şarê Kurdî Abdullah Ocalan bi lezûbez bêro veradayîş.
‘Kesî ke aştî nêwazeno merdim nîyo’
Dewijî dewa Fîsî ra Mehmet Fîdan ê (55) serre dîyar kerd ke wexto ke 8 serre bîyo PKK dewa înan de ameyo ronayene û wina vat: “Kongre keyeyê datê pîyê mi Seyfettîn Zûgûrlî de virazîya. Heme nika yeno vîrê mi. Nika ez bîya 55 serre, no kar bi kiştişî nêqedîyeno. Sere de keyeyê ma ra 100 kesan cuya xo vînî kerde. 55 serrî yo şer est o, kiştiş est o. Ma ra zî hetê tirkan ra zî zaf kesan cuya xo vînî kerde. Şer çîyêko baş nîyo. Aşîtî çîyêko baş û weş o. Her kes aramîye wazeno. La ganî heqê ma yê kurdan bêrê dayene. Têkoşînêko ke 47 serrî yo yeno dayene est o. Ganî ma kurdî zî sey tirkan na dewlete de bîciwî. Kesê ke aşîtî nêwazeno wextêk merdim nîyo.”
‘Ma aramîye û têhetameyîş wazenî’
Mehmet Fîdan ard ziwan ke ê destek danî vengdayîşê Rayberê Şarê Kurdî Abdullah Ocalanî û qerarê kongreya PKK’î û dîyar kerd ke veng û qerarê kongre seba aşîtîye baş ê. Mehmet Fîdan ard ziwan ke ganî dewlete zî bi lez game bierzo û wina domna: “Bi xapînayîşî no kar nêşino ser do 50 serrî bîn zî no şer dewam bikero, ganî heqê ma yê kurdan bêrê dayene. Ganî ziwanê kurdkî bibo fermî. Heme hepsîyanê sîyasîyan bêrê veradayene. Eke Serek nêro veradayene qîymetê nê karî çin o. Ganî ma pîya bîciwî. Ma aşîtî ra kêweş î. Ma aramîye û têhetameyîş wazenî. Partî çi qerar bido, ma pey partîya xo de yî.”
‘Beton rijîyabî kurdan ser, partîye kurdî cuya da kurdan’
Mehmet Fîdan dîyar kerd ke keyeyo ke PKK’î kongreya xo tede viraştbî seba ke xera nêbo embazanê înan tamîr kerd û nê çîyî vatî: “Ganî o keye bibo mûze. Seba kurdan mûze yo. Beton rijîyabî kurdan ser, kurdî êdî nêmendibî, partîye kurdî cuya da înan û dinya da nasîyayî. Seba nê zî zaf bedelî ameyî dayene. Tu merdim nê bedelan vîr nêkeno.”
‘Ma hêvî kenî ke pêvajo ver bi başîye şona’
Cîhan Şahînlîyo ke 39 serre yo û dewe de karê berberî keno, dîyar kerd ke ê bi na pêvajoya ewroyîn ra keyfweş ê û wina vat: “Bawerîya ma pê est a. Ma hêvî kenî ke do ser bikewa. Muhatabê na pêvajo Serek o, ganî o bêro veradayîş.”
Cîhan Şahînlî dîyar kerd ke têkoşînê 47 serran de ê zaf zehmetî antî û wina domna: “Na pêvajo de Dewleta Tirke zaf zilm ma rê kerd, dewanê ma veşna, xirabî kerdî. Ma heme dîyî la şer çare nîyo. Serekî vat; ma do têhet bêrê. O dewlete reyde qisey keno. Ma hêvî kenî ke pêvajo ver bi weşîye şona.”
‘Ma wazenî Serek Apo bêro ewta’
Hewna dewij, Abdullah Altintop ê (60) serre yo, wina va: “Serek Apo Fisî de no têkoşîn da destpêkerdiş. Ma wazenî Serek Apo bêro ewta. Ewta de cayê ey zî est o. Ma na pêvajo zaf weş vînenî. Ganî verî Serek bêro veradayîş. Bivejîyo mîyanê şarî ke na pêvajo bi netîce bo. Hetanî o nêvejîyo no kar nêbeno.”
