Verfekê Platformê Şubeyanê KESK’î yê Amedî Mehmet Nûr Ûlûsî derheqê 1ê Gulane Roşanê Karker û Kedkaran de dîyar kerd ke cayo ke tede de şer est bo, karker û şarî aram nîyê û her kesî dawetê mîtîngê 1ê Gulane yê Amedî kerd.
Pêşengîya Konfederasyonê Sendîkayanê Kedkaranê Cemawerîye (KESK), Konfederasyonê Sendîkayanê Karkeranê Şorişgeran (DÎSK), Komîteyê Koordînasyonê Şaristanî yê Amedî yê TMMOB’î û Odaya Doxtoran a Amedî de do bi sloganî “Seba Azadîya Kede û Komelê Demokratîkî 1ê Gulane de Ma Meydanan de yê” 1ê Gulane de saete 12.00î de Meydanê Îstasyonî yê Amedî de mîtîngêk bêro organîzekerdene. Mîtîngî de ke Platformê Kede û Demokrasîyî yê Amedî zî do ca bigêro, Hemserekê DEM Partî yê Pêroyî Tûncer Bakirhan, Hemserekê KESK’î yê Pêroyî Ahmet Karagoz û endamê Konseyê Merkezî yê Yewîya Doxtoran a Tirkîya (TTB) Şerîf Demîr do sey qiseykerdox beşdar bibê. Her wina hunermend Kasim Taşdogan û Helîm Omerî zî mîtîngî de do sehne bigîrê.
Verfekê Platformê Şubeyanê Konfederasyonê Sendîkayanê Kedkaranê Cemawerîye (KESK) yê Amedî û Hemserekê Sendîkaya Kedkaranê Xizmetanê Komelî û Weşîye (SES) Mehmet Nûr Ûlûsî derheqê programê 1ê Gulane yê Amedî de qisey kerd û her kesî dawetê mîtîngê 1ê Gulane kerd.
‘Ganî seba heqê keda xo têkoşînî bidê’
Mehmet Nûr Ûlûsî vat ke tarîxê 1ê Gulane seba karker û kedkaran zaf muhîm o û wina dewam kerd: “Seba ke heqê karker û karmendan bêro girewtene, têkoşînêko zaf gird ameyo dayene. Nê têkoşînî de zaf bedêlî zî ameyê dayene. Ma zanê ma kamca de vindenê. 1ê Gulane piştgirîya karker û kedkaran a. Şarê ma pêro kedkar o, kede dano. Ganî seba heqê keda xo têkoşîn bidê, xo rêxistin bikerê.”
Mehmet Nûr Ûlûsî seba mîtîngê 1ê Gulanî vengdarîye hemî karker, karmend û şarî kerd ke beşdarê mîtîngî bibê û wina dewam kerd: “Kesê ke xo sey bindetî vînenê û neheqî înan rê bena, ma înan dawet kenîme Meydanê Îstasyonî. Seba ney zî xebatê ma temam bîyê. Ma wazenîme karker û kedkarê ke senayi de xebitîyenê zî beşdarê mîtîngî bibê. Seba ney zî ma miyanê liv û tevger de yê.”
‘Seba ke şar bieşko debara xo bikero ganî aştîyêk bibo’
Mehmet Nûr Ûlûsî dîyar kerd ke 1ê Gulane seba înan eynê demî de roja mesajdayîşî ya û wina dewam kerd: “Vengdayîşê ma zaf zaf ê. Ma vanê ke eger tîya de şerêko zor est bo, karmend û şar aram nîyê. Nêşenê debara xo bikê. Ma bi nê esasî ewnîyenê ci ra. Coka ganî aştîyêka birumet na erdnîgarî de bêra awankerdene. Mesajê ma yo tewr gird no yo. Hetê bînî ra meseleyêka demokratîkbîyayîşî est a. Komel demokratîk nîyo. Kes nêşeno fikrê xo vajo. No zilm o ya. Ma nê zilmî qebul nêkenî. Ma sey karker, karmend kargehî de xebitîyenê la nêşênê heqanê xo bigêrê. Problemê ma yê ke seba girewtişê heqanê bingeyînan zaf zaf ê. Ma zî do meydanî de nê mesajan bidê û vengê xo vejê. Serra 2015î ra pey embazê ma bi tarzêko neheq kar ra ameyî eştene. Seba ke meseleyê kurdan ser o çîyê vato yan zî kargeh de kurdkî qisey kerdo kar ra ameyê eştene. No sey suc ameyo dîyene û embazê ma kar ra ameyê eştene. Nê new serrî yê hema embazê ma nêameyê karê xo ser, dewayê înan dewam kenê û seba ke heqanê xo bigêrê, pawenê. Ganî nê embazê ma bêrê karê xo ser o û ganî na neheqî bêra qedênayene. Her wina miyanê ciwanan û şarî de bêkarîyek est a, nêşenê kar bivînê, no problemêko tewr gird o. Zanîngeh de wanenê, paweyê îmtîhanî manenê, kar nêvînenê. Wexto ke problemêk hetê aborî ra vejîyeno vanê ma do teserruf bikerê, humara karker û karmendan kêmî kenê. Ma nînan qebul nêkenê. Ma do meydanê 1ê Gulane de nê mesajan bidê. Û seba ke vengdayîşê ma biresê cayê xo ma do têkoşîn û piştgirîya xo gird bikerê.”
Şarî dawetê mîtîngê 1ê Gulane kerd
Mehmet Nûr Ûlûsî heme şarê Amedî dawet kerd mîtîngî û va: “Ma şarê Kurdî û şarê Amedî rê wina vanê. 1ê Gulane seba hema şaran piştgirî ya. Ganî ma waranê 1ê Gulane de ca bigêrê. Pê komelêka girde ma mîtîngê xo bîyar ca ke vengdayîşê ma biresê amancê xo. Coka ma reyna şarê Amedî, karker, karmend û heme şarê xo dawet kenê Meydanê Îstasyonî.”
