Endam û rayberê MEBYA-DER’a Amedî bi munasebetê mîtîngê “Hêvî û Azadîye” yo ke 4ê çeleyê 2026î de seba azadîya fîzîkî ya Rayberê Şarê Kurdî Abdullah Ocalanî bêro kerdene, vengdayîşê beşdarîye kerd û vat: “Heta ke Serekê ma azad nêbo ma zî azad nêbenê.”
Endam û rayberê Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER) ke derheqê vengdayîşê mîtîngê “Hêvî û Azadîye” yê seba azadîya fîzîkî ya Rayberê Şarê Kurdî Abdullah Ocalan ke do 4ê çele de Amed de Qadê Îstasyonî de bêro kerdene, vengdayîşê beşdarîya mîtîngî kerd û vat: “Ma vengdanê her ferdê komelî ke a roje seba azadîya fîzîkî ya Rayberê Şarê Kurdî Abdullah Ocalanî beşdarê mîtîngî bibê.”
Endam û rayberê MEBYA-DER’a Amedî vengdayîşê mîtîngê “Hêvî û Azadîye” kerd û vat: “Ma heme şarê xo yê ke Amed de û şaristananê bînan de ciwîyenê, silaynenê mîtîngê 4ê çeleyî. No mîtîng xeylê muhîm o, lazim o her kes seferber bibo û seba azadîya Rayber Apoyî uca de vengê xo berz bikero. Azadîya fîzîkî ya Rayber Apoyî seba ma çîyo sereke yo. Heta ke Serekê ma azad nêbo ma zî azad nêbenê. Ganî ma vengê xo biresnê erd û asmênî û her kes vengê ma bieşnawo. Ma do destê aştî û Rayber Apoyî bigîrê ke aştîyêka domdare awan biba. Serrêk a hema zî gamê şênberî nêameyê eştene. Heta nika hema zî destê aştî derg nêkerdo û bi dek û dolaban têgêrenê. Ma do karê xo bireserûber bikerê. O semedî ra ganî her kes beşdarê mîtîngî bibo. Nê çîyî ke ameyê kerdene zî heme bi kede û ereqa Serekî ya. Heme şarê Rojhelatê Mîyanênî zanê ke no proje yê Serekî yo. Nika heme dinya nê ser o vinderta.”
