Cinîyanê ciwanan ra Ceren Leventoglû seba 8ê Adare vengda û vat: “Vera mobîng, kedwerîye, taacîz û zilmê camêrdan, seba ke Gulhan rê edalet biwazê û seba aqûbetê Rojîn Kabaîş bipirsê, ma qadan de bê.”
8ê Adare Roja Cinîyan a Dina nêzdî bi û cinîyê ciwanî seba qadan amadekarîyan kenê. Cinî do Eskîşehîr de daet 17:00î de vernîya Esparkî de bêrê têhet û bi rojevê serewedaritiş û xoverdayîşî qadan de bibê.
Cinîyanê ciwanan ra Ceren Leventoglû hedîseyê Gulhan Albayrak yê vernîya keyeyê xo de ke bi 7 gulleyan ameyê kiştene, ard vîr û vat: “Dewleta camêrd ya cinîyan zereyê keye de tepişena yan zî mehkûmê xebatanê bêtemînat kena. Mehkema zî faîlam bi polîtîkaya cezanêkerdişî, xelat dana înan. Vera mobîng, kedwerîye, taacîz û zilmê camêrdan, seba ke Gulhan rê edalet biwazê û seba aqûbetê Rojîn Kabaîş bipirsê, ma qadan de bê. Cinî mecbûr ê vejîyê qadan.”
‘Hemverê ma de dişmenêko rêxistinkerda est o’
Senem Çelîk bale ant xoverdayîşê wendekaranê zanîngehî ser o û vat: “Wendekarê zanîngehî yê cinîyî serdemê perwerdeyî yê parî de xoverdayîşêko pîl mojna. Nnimûneyanê verî ra ma zanê ke wexto ke paştî bîdê yewbînan destkewteyê înan benê. Serra 2025 bi waştişê ‘serra keyeyî’ ya rejîmê qesrî reyde dest pêkerd. Hemverê ma de dişmenêko rêxistinkerde est o û ganî ma zî xo rêxistin bikerê û piştî bidê yewbînan.”
Seba vejîyayîşê qadan vengdayîş
Bahar Baytekîn ard ziwan ke qirkerdişê vera cinîyan roje bi roje zaf benê û zilmê camêrdan vejeyo lûtke. Bahar Beytekîn qiseykerdişê xo wina qedêna: “Vera hêrişanê cuye û leşa ma, ma serewedarê, piştî bidê yewbînan. No wezîfeyê ma yo. Sey cinî û LGBT+Îyan ma bi sloganê ‘Ma 8ê Adare de est ê, ma tîya de yê, qadan de yê’ kewtê rayîr. Seba pilkerdişê piştgirîya cinîyan, ma kampusan ra, wareyan ra û keyeyan ra vejîyenê qadan û seba vengê xo hîna berz bikerê, yenê têhet. Seba ma na serre zî ‘serra keyeyî’ ra vejê û bikerê serra xoverdayîş û serewedaritişî, ma vengdanê heme cinîyan ke piştî bidê yewbînan û ma pîya vejîyê kuçeyan û ray ra şêrê.”
