Bi munasebetê serra qirkerdişê Dêrsîmî ya 89. (937-38), şaristanê Maînz de ke girêdayeyê Almanya yo, çalakîya vîrardişî ameye organizekerdene. Dezgehanê Elewîyan û rêxistinanê gird ê demokratîkan, seba çalakîya vîrardişî, beşdarbîyayîşêko xurt waşt.
4ê gulana 1937î de bi qerarê Encumenê Wezîran, dest bi operasyonê leşkerî ame kerdene. Demê operasyonê leşkerî de bi des hezeran kesî cuya xo ra bîyê û xeylê merdimî zî koçber bîyê. Mîyanê nê hedîseyan de bi taybetî cinî, gede û kokimî ameyê hedefgirewtene û bi seyan gedeyî zî erşawîyayê dezgehanê dewlete, tayê gedeyê kênayî keyeyanê xo ra ameyê visîyayîş.
Ser ra 89 serrî derbas bîyê zî, dejê ke hedîseyanê qirkerdişî ra mendê, seba înan hema zî waştişê edaletî dewam keno. Dêrsîmijî nê wextî sey “Roja Tarî” û “Roza Saye” bi name kenê û yad kenê.
Dezgehan eşkarayîyêka hempar vila kerd û heme kesanê ke demokrasî û heqanê merdiman pawenê, ê silaynayê vîrardişê 2yê gulana 2026î. Vîrardiş, do roja şeme saete 14:30î de Stadttheater Maînzî bibo.
Paştîdayîşêko girseyî û îradeyêko hempar
Çalakîya vîrardişî hetê Federasyonê Yewîya Elewîyan ê Almanya (AABF), Federasyonê Demokratîk ê Elewîyan (FEDA), Federasyonê Yewîya Dêrsimî yê Demokratîk yê Ewropa (ADEF), Kongreya Awankerdişî ya Dêrsimî (DIK), Yewîya Cinîyanê Elewîyan a Ewropa (AABK), Keyeyê Cemî yê Maînzî, Komala Pazarcik ya Maînzî, Keyeyê Cemî yê Gustavsburdî, Federasyonê Karkeranê Tirkîyayijan ê Almanya (ATIF), Federasyonê Karkeran ê Koçberan ê Almanya (AGIF), Keyeyê Cemî yê Koblenzî, Komela Pîrsultan Abdalî-Alsey, Komela Kulturverein yê Rhein-Main e.V, Komela Hemverê Qirkerdişê 38ê yê Dêrsimî, Merkezê Kulturî yê Elewî yê Frankfurt, Bad Homburg AKM, Hochtaunus AKM, Dêrsim Spor-Russelsheim, Merkezê Komela Kurd-Maînzî û Stuttgart Platformê Têkoşîn ê Hemverê Qirkerdişan yena organîzekerdene û destekkerdene.
