Dîrektora CFWIJ’î ya Ewropayî Maîre Rowlan derheqê qetilkerdiş û tepiştişê rojnamegeranê kurdan de qisey kerd û vat: “Ma venga Dadgeha Ceza ya Mîyanneteweyî danê ke mufetîş bişirawê û venga NY’î zî kenê ke rolê Tirkîyaye na hedîse cigêrayîş bikero.
Vakur û Rojhelatê Sûrîye de wesayîtê rojnamegeranê çapemenîya azade Nazim Daştan û Cîhan Bîlgîne hetê SÎHAyê Tirkîya ra hedef ame girewtiş û ameyî qetilkerdiş. Her hetî ra reaksîyonê hemverê qetilkerdişê rojnamegeran ame mojnayîş û hêrişî ameyî şermezarkerdiş.
Koalîsyonê Cinîyan ê Rojnamegerîye (CFWIJ) ya Ewropayî Maîre Rowland, derheqê qetilkerdiş û tedayê hemverê rojnamegeran de Jinnews rê qisey kerd.
‘Rojnamegerî semedo ke karê xo kenê binê zulmî de yê’
Maîre Rowland da zanayîş ke rojnamegerê Tirkîya semedo ke karê xo kenê zulm ciwîyenê û vat: ”Tedayê çapemenîya kurdan ser o, rojnamegerê kurdî, tepiştişê bi sûcdarîya terorî bîyo meseleyêke rojane. Na teda binpaykerdişê azadîya çapemenîye ya. 2015ine de badê ke masaya aştîye ameye qelibnayîş, tedayê rojnamegeranê kurdan ser o giran bî. Bi sûcdarîya terorî ameyî muhakemekerdiş. 2019ine ra heta nika bi hedîseyê desteştişê qanûnî se ra 54 hemverê mûxabîranê kurdan ê. Sûcê girêdayeyê terorî ra 87 rojnamegerê cinî ameyî muhakemekerdiş û nînan ra 78ê xo kurdî bî.”
‘Terorîzekerdiş zirar dano azadîya çapemenîye’
Maîre Rowland dewam de vat: “Armancê ma o bî ke ma tedayanê selahîyetdaranê tirkan yê hemverê rojnamegeran de vejê werte. Hukmat hewl dano ke yê ke ameyê qetilkerdiş krîmînalîze bikerê û paştdayîş çin bikerî. Terorîzekerdişê rojnamegeran zirar dano azadîya çapemenîye. Ma sey CFWIJ’î venga pêro sazgehê mîyanneteweyî û çapemenîye kenê ke nê hewldayîşê bêîtîbarî û hêrişê hemverê çapemenîye qebûl nêkerê. Ganî rojnamegerî hedef nêrê girewtiş, bêrê pawitiş û semedê înan rêzdarî bêro mojnayîş.”
‘Ganî nê cînayetî bêcewab nêmanê’
Maîre Rowland dîyar kerd ganî reaksîyon bêro mojnayîş û vat: “Ma venga Dadgeha Ceza ya Mîyanneteweyî kenê ke mufetîşan bişirawê û NY’î rê zî kenê ke rolê Tirkîya na hedîse de cigêrayîş bikero. Nê cînayetî ganî bêcewab nêmanê. Ganî edalet ca bîyarê. Hesab bêro perskerdiş. Eke netîceyêke nêro girewtiş, do hêrişê hemverê rojnamegeran dewam bikerê. Do cuya rojnamegeran û çapemenîya azad binê rîskî de bibo.”
‘Ganî lezkî bêrê veradayîş’
Maîre Rowland tewr peyîn wina vat: “Hedefgirewtişê rojnamegerê ke qetilkerdişê meslegderanê xo protesto kerdê, hêrişêk hemverê ercê demokratîke, azadiya çapemenîye yo. Ganî rojnamegerî bêters, bi hawayêkê azad bêro kerdiş. Ganî rojnamegerî lezkî bêrê veradayîş.”
