Derheqê Kitabê “Malmîsanijî va û nuşt”î de amadekaran va ke nuşteyê Malmîsanijî ke destpêk ra heta ewro kovare û rojnameyan de weşanîyayê, înan waşt ke ê biresê heme wendoxan
M. Malmîsanij ke nuştoxanê tewr verênan ê kirmanckî (zazakî) ra yew o û bi serran o ke ziwan, tarîx, kultur û edebîyatê kirmanckî ser o xebatan keno, nuşteyanê xo de zafêr meseleyanê tarîx, ziwan, gramer û kulturî ser o vinderto.
Alî Aydin Çîçek û Şadê Agon ke kitab amade kerdo, Ajansa Welatî rê qisey kerd û va ke seba ke nuşteyê Malmîsanijî arşîvanê kovaran û rojnameyan de vindî nêbê û biresê wendoxan, înan na xebate kerda. Çîçekî îfade kerd ke xeylê wext o ke nê karî ser o xebitîyayêne û bi hawayêko aktîf emser dest pêkerdo.
“Ma waşt ke pêroyê nuşteyanê M. Malmîsanijî kitabêk de pêser bikerê û arşîvêko mende awan bikerê. Çunke nê nuşte û roportajî seba ziwan û gramerê kirmanckî zaf hêja û girîng ê. Seke yeno zanayene teknolojî aver şîyo labelê arşîvê nuşteyanê kurdkî mîyanê rewşanê sîyasîyan de raştê texrîbatan ameyê. Coka ma waşt ke na xebate bikerê.”
Amadekerdoxan qeyd kerd ke Malmîsanijî bi xo zî nê prosesî de înan reyde bîyo û bi rexne û pêşnîyazanê xo hetkarîya înan kerda.
Şadê Agon ke Fuarê Kitaban ê Amedî de kitabe xo û Alî Aydin Çîçekî îmza kerd, va ke wendoxî eleqeyêko baş mojnenê kitabî û kitabo ke weşanxaneyê VATEyî ra vejîyayo do rafan de nêmano û do wendoxan rê rayîrêk akero.
