Avûkato îtalyayij Fabio Marcelliyo vat, “Seba ke Abdullah Ocalan bieşko rolê xo kay bikero, gerek tecrîd bêro wedaritene û o serbest veradîyo.”
Çarçaweya kampanyaya “Ez wazena Abdullah Ocalanî bivîna” de 39 kesan ra heyetêk ame Tirkîya. Avûkato îtalyayij Fabio Marcelliyo ke heyetî de ca gêno, ajansê ANF’yî rê qisey kerd. Marcellîyo ke 33 serrî yo meseleyê kurdan reyde eleqedar beno, vat semedê aştîyêka edîle çîyo muhîm o yo ke şar wayîrê prosesî vejîyo.
Marcelliyî bale ant muhîmîya fikranê Abdullah Ocalanî ser o û nê vatî: “Ewro ma vînenê ke çîyê ke Rojhelatê Mîyanênî de qewimîyenê, bi taybetî zî kerdişê Îsraîlî yê vera Fîlîstînî qet hol nêşino.Na çarçewe de fîkrê komelê demokratîkî yê Ocalanî rayîrê xelisnayîşî mojnenê. Nê hetî ra konfederalîzmo demokratîk tena Rojhelatê Mîynênî de ney, eşkeno xeylê welatan de bêro caardene. Çunke komelê kapîtalîstî de eke ti tewrbîyayîşê komelî bigîrê çimî ver, dengeyê hêzî eşkenê bêrê bedilnayene.”
Marcelliyî îfade kerd ke seba ke Abdullah Ocalan bieşko rolê xo kay bikero, gerek tecrîd bêro wedaritene û o serbest veradîyo û vat: “Ma zanê ke şarê kurdî sere de ziwanê dayîke wayîrê heqanê xo nîyo. Nê heqê qanûnî gerek zemînê qanûnî de bîgîrîyê binê temînatî. Eynî qeyde gerek proseso ke yeno rayraberdene, o zî bîgîrîyo binê temînatî. Gerek hukmatê Tirkîya game bierzo.”
Marcelliyî bale ant muhîmîya wayîrvejîyayîşê prosesî ser o û nê vatî: “Zaf muhîm o ke şar wayîrê prosesî vejîyo. Ê ke şer kenê, xora kenê la şarî ra qet çew şer nêwazeno. Tirkîya de çareserkerdişê meseleyê kurdan yeno manaya demokratîkbîyayîşê her kesî. Tena eke şar tewrê prosesî bibo demokratîkbîyayîş beno. Çîyo muhîm o yo ke mesele bibo komelkî.”
