Fermandarê Pêroyî yê HSD’yî Mazlûm Ebdî derheqê kesanê ke Kobanê de hêrişê SÎHA’yî ameyê kiştene beyanatêk da. Beyanatî de dîyar kerd ke ganî qerarê adirbestêko mende bêrô girewtene.
Dewleta Tirke vizêr dewa Berxbotan ya Kobanê bi SÎHA’yan hêrîşê keyeyêk kerd. Nê hêrişî de ke nêmeyê şewe de ame kerdene, ma û pî û 7 domanî yew keye de ameyê kiştene. Derheqê qirkerdişî de zaf hetan ra reaksîyon ame mojnayene. Reaksîyonêk zî Fermandarê Pêroyî yê Hêzanê Sûrîya Demokratîke (HSD) Mazlûm Ebdî ra ame. Ebdî beyanatê de ke hesabê xo yê X’î ser o da dîyar kerd ke ganî hêrişî bêrê vindarnayene.
Beyanatê Mazlûm Ebdî wina yo:
Hêzê mîyannetewî ganî berpirsîyarî bigîrê
“Keyeyo ke hêrişê dewleta tirke de cuya xo vîndî kerda, ma seba keyeyê înan serweşîye wazenê. Kesê ke birîndar bîyê, seba înan zî şîfaya xeyrine wazenê. Hedefgirewtişê citkar û gedeyan sûcê merdimîye yo. Hukmato demkî bi destê dewletanê xerîban vera qirkerdişê welatijan ganî berpirsîyarî bigîro. Ma veng danê Koalîsyonanê Mîyannetewî ke herême de yê û hêzê ke herême de tesîrdar ê seba ke nê sûcan bivindarnê, ganî berpirsîyarî bigîrê. Pêroyê Sûrîye de bicaardişê adirbestêko mende seba ameyoxêko aştîyane û ewle mecburîyetêk o.
