Fermandarê Pêroyî yê HSD’yî Mazlum Ebdî û Hemsereka Dayîreyê Têkîlîyanê Teberî ya Rayberîya Xosere ya Vakûr û Rojhelatê Sûrîye Îlham Ehmed beşdarê Forumê Aştî û Ewleyî yê Rojhelatê Mîyanên ê Dihokî bîyê.
Heyetê Rojavayê Kurdîstanî yo ke Fermandarê Pêroyî yê Hêzanê Sûrîya Demokratîke (HSD) Mazlum Ebdî û Hemsereka Dayîreyê Têkîlîyanê Teberî ya Rayberîya Xosere ya Vakûr û Rojhelatê Sûrîye Îlham Ehmed ra yeno pê, Dihok de beşdarê Forumê Aştî û Ewleyî yê Rojhelatê Mîyanênî yo 6. bîyê. No forum Unîversîteya Amerîka ya Kurdîstanî ya Dihokî de ame kerdene.
Mazlum Ebdî û Îlham Ehmed vernîya cayê forumî de hetê rayedaranê PDK û Herêma Kurdîstanî ra ameyê pêşwazîkerdene û dima vîyartê zereyê salona forumî. Cayê Forumî de Serekwezîrê Herêma Federe ya Kurdîstanî Mesrur Barzanî pêşwazîya Mazlum Ebdî û Îlham Ehmed kerd. Demo ke Mazlum Ebdî û Îlham Ehmed ameyê salona forumî, her kes warişt lingan ser o û bi çepikan ê pêşwazî kerdê.
Xeylê sîyasetmedar, kesayet, zanyar, rojnameger û berpirsê herême û welatan beşdarê forumî bîyê. Forumî de problemê ke Îraq, Kurdîstan û Rojhelatê Mîyanênî de qewimîyenê, ameyê qiseykerdene.
Parlamenterê HDP’yî yê verê Osman Baydemîr, Parlamenterê DEM Partî Cengîz Çandar zî beşdarê forumî bîyê.
Ame zanayene ke parlamenterê AKP’yî yê Êlihî Ferhat Nasiroglu û Serekê Pêroyî yê Gelecek Partî Ahmet Davutoglu ke vizêr beşdarê forumî bibi, verê ke Mazlum Ebdî û Îlham Ehmed bêrê cayê forumî, ê Dihok ra vejîyayê.
