Meclîsê Dayîkanê Aştî ke derheqê “Prosesê Aştî û Komelê Demokratîkî” de xeylê şaristanan de eşkerayîdaye, wina vat: “Pêroyê dinya dî ke bêyî azadîya Rayberê Şarê Kurdî Abdullah Ocalanî aştî nêbena.”
10ê kanûna 1948î de Komîzsyonê Pêroyî yê Neteweyanê Yewbîyayeyan beynnameyê unîversal ê heqanê merdiman amade kerd. Bi nê beyannameyî ke 30 nuqtayan ra yeno pê, heqê merdiman ê unîversalî ameyê dîyarkerdene. Ney ra pey Neteweyanê Yewbîyayeyî serra 1950î de 10 û 17ê kanûne sey hewteyê “Heqanê Merdiman” îlan kerd. Meclîsê Dayîkanê Aştî çarçewaya hewteyê Heqanê Merdiman de derheqê “Prosesê Aştî û Komelê Demokratîkî” de Amed û Şirnex de eşkerayî daye çapemenî. Meclîsê Dayîkanê Aştî yê Amedî zî awanîya Şubeyê Komela Heqanê Merdiman (ÎHD) de eşkerayî daye. Dayîkanê Aştî, rayberê Şubeyê ÎHD’yî yê Amedî beşdarê eşkrayî bîyê.
‘Ma wazenê şîrê Îmrali’
Tîya de ewilî Endama Meclîsê Dayîkanê Aştî Nezahat Teke qisey kerd û dîyar kerd ke keso ke do çareserî bîyaro Rayberê Şarê Kurdî Abdullah Ocalan o û vat: “Vendgayîşê Rayberê Şarê Kurdî Abdullah Ocalanî ser o nêzdîyê serrêk vîyart. Vengdayîşê 27ê sibate ser o PKK’yî xo fesih kerd. La dewlete hema zî tu game nêeştê. Yeno vatene ke ‘qonaxa yewine qedîyaye’ la ma heta nika tu gamî nêdîyê. Tena Meclîs ke Komîsyon ame awankerdene la bes nîyo. Komîsyon şi Îmrali la ganî ewil Dayîkê Aştî bişîyêne Îmrali. Dayîkan xeylê dej di la hema zî destanê xo dekenê binê kerra. Ma wazenê şîrê Îmrali. Wa dayîkê tirkî zî destanê xo bidê ma. Ma aştîwaz ê. Ganî heqê hêvî bêro ca. Pêroyê dinya dî ke bêyî azadîya Rayberê Şarê Kurdî Abdullah Ocalanî aştî nêbena.”
Dayîkê Botanî: Ma wazenê şîrê hetê Serekê xo
Meclîsê Dayîkanê Aştî yê Şirnexî zî vernîya awanîya Şubeyê ÎHD’yî yê Şirnexî eşkerayî daye. Rayber û endamê partîyanê sîyasî, sazgehê sîvîl ê komelkî û xeylê dayîkî beşdarê eşkerayî bîyê. Eşkerayî de Verfeka Meclîsê Dayîkanê Aştî ya Şirnexî Behîye Nayir qisey kerdene û vat: “Ma vengdanê dewlete û wezîre edaletî, ma Dayîkê Aştî yê û ma aştî wazenê. Ma wazenê şîrê hetê Serekê xo. Wa CHP nê nêzdîbîyayîşî xo ra fek verada û piştgirîye bikera. Wa Tirkîya de êdî şer çin bo. Wa êdî dayîkî hesiranê çiman nêvarnê.”
Eşkerayî bi vatişê sloganê, ‘Jin jîyan azadî’ û çepikan qedîyaye.
Meclisê Dayîkanê Aştî yê Wanî: Ma wazenê berê Îmraliyî bêrê akerdene
Meclîsê Dayîkanê Aştî yê Wanî seba ke şîrê Îmraliyî Rayberê Şarê Kurdî Abdullah Ocalanî reyde pêvînayîş bikerê, awanîya Şubeyê Komela Heqanê Merdiman (ÎHD) ê Wanî de eşkerayî daye. Eşkerayî de endamê Komela Dayîkanê Aştî yê Erdîşî zî amade bîyê.
Dayîka Aştî Guleser Îşler dîyar kerd ke ê wazenê şîrê Îmrali û Rayberê Şarê Kurdî Abdullah Ocalanî reyde pêvînayîş bikerê. Guleser Îşler da zanayene ke ê Wezaretê Edaletî ra wazenê ke, komîsyono ke şono Îmrali, ey de ca bigîrê û vat: “Heyet şono ka ma zî wazenê Rayberê Şarê Kurdî Abdullah Ocalanî reyde pêvînayîş bikerê. Ma wazenê aştî biba. Nê prosesî de barê ma dayîkan giran o. Ma dayîkê leşker û polîsan, ganî mil bi mil vinderê û paştî bidê nê prosesî. Ma wazenê ke hesirê çimê dayîkan vinderê. Ma wazenê berê Îmraliyî ma rê bêrê akerdene ke ma zî şîrê. Wa vatişê ma yew bo ke prosesê aştî serkewo. Bi vatişêkê Rayberê Şarê Kurdî Abdullah Ocalanî çekî mayê veşnayene. Ganî no hêz û îrade bêro vînayene. Ma wazenê ke adirô ke zerrîya dayîkan veşneno, bitefîyo. Ma tîya ra silamanê xo Îmraliyî rê erşawenê.
‘CHP piştgirîya prosesî nêkena’
Dima ra endama Komela Dayîkanê Aştî ya Erdîşî Hedîye Koçak qisey kerd û dîyar kerd ke dayîkan xeylê bedêlê giranî dayê û gedeyê xo vîndî kerdê. Hedîye Koçak bale ant beşdarîya înan a komîsyonî ser o û nê çîyî vatê: “Ma bedêlê giranî dayê. Ma gedeyê xo vîndî kerdê û nika ma aştî wazenê. Vengdayîşê mi seba heme şarê kurdî yo. Her çend CHP bi saya kurdan Stenbol, Anqara û xeylê şaredarîyê bîn ê girdî girewtê zî, ê nika paştî nêdanê prosesî. No helwêst neyeno qebulkerdene. Şare kurd nêeşkeno azad bibo heta ke Rayber azad nêbo. Kilîtê çareserî destê Rayberî de yo. Ma nêwazenê zerrîya tu dayîkan biveşa.”
Eşkerayî bi çepikan qedîyaye.
