Birayê Rayberê Şarê Kurdî Abdullah Ocalanî, Mehmet Ocalanî vat ke komployo mîyanneteweyî hemverê heme kurdan de ameyo kerdene û vat: “Eke wazenê problemê kurdan çareser bikerê û nê prosesî rayra berê, ganî verê heme çî Serek azad bibo.”
Mehmet Ocalanî vat ke komployê 1999î û yê ewroyêne sey yewbînan ê û wina domna: “Kurdan Rojava de hemverê DAÎŞ’î de şer kerd û bi gonîya xo vernîya înan girwwte. 14 serran ra dima Amerîka, Îsraîl û Tirkîya newe ra hemverê kurdan de komplo kerd û waşt ke destkewteyanê kurdan hewanê. Hemverê ci de kurdî çar parçeyan de wirzîyayî ser lingan. Ganî na yewîye dewam bikero.”
Mehmet Ocalanî ke tecrîdî ra dima di rey şîbî Girawa Îmralî û birayê xo de pêdîyabî, pêdîyayîşî ra qisey kerd: “Pêdîyayîşê peynî çend aşman ra ver bî, nêzdîyê 2,5 saetî ma qisey kerd. Serekî mi ra pers kerd ‘Ti prosesî senî vînenê?’ Mi vat bawerîya şarî est a to ra la dewlete ra qet çin a. Serekî zî vat şar rast vano. Seba Rojava zî vatbi ‘Ganî baldar bibê, amadekarîyanê xo bikerê. Eşkenê herkesan reyde pêbikerê la wa rasterast bikerê.’ Serek ê wextî ra rewşa ewroyêne dîbî.”
Mehmet Ocalanî peynîye de vat: “Ganî rew Heqê Hêvîye seba Serekî bêro caardene. Bi vatişan ney, pratîk de bêro kerdene. Eke Serek azad bibo no proses do aver şêro. Kerdoxê sereke yê nê prosesî Serek o.”
