Birayê Rayberê Şarê Kurdî Abdullah Ocalan, Mehmet Ocalanî vengdayîşê beşdarîya programanê festîvala kerd ke bi munasebetê 4ê Nîsane rojbîyayîşê Rayberê Şarê Kurdî Abdullah Ocalanî yena kerdene û vat: “Ma ver bi çinbîyayîşî bîyê la nika bi saya Serek û embazanê ey ma çinbîyayîşî ra ameyê asta estbîyayîşî.”
Bi munasebetê 4ê Nîsane rojbîyayîşê Rayberê Şarê Kurdî Abdullah Ocalanî çalakîyê cîya-cîyayî yenê organîzekerdene. Pîrozkerdişê ke 1ê Nîsane ra ameyê destpêkerdene, 3 rojî yo bêmabên dewam kenê. Xeylê şaristananê vakurê Kurdîstanî de seba Rayberê Şarê Kurdî Abdullah Ocalanî şitilê daran yenê ronayene. Eynê wextî de zî xeylê qezayanê Riha de çarçewaya festîvale de programî yenê organîzekerdene.
‘Estbîyayîş wina xover nêbi’
Welatîyê ke beşdarê festîvale benê, xo bi cil û berganê kesk û sûr û zerdan xemilnenê û bi girseyî rojbîyayîşê Rayberê Şarê Kurdî Abdullah Ocalanî pîroz kenê. Slogan û tedeyîyê festîvale û çalakîyê waştişê azadîya fîzîkî ya Rayberê Şarê Kurdî Abdullah Ocalanî ya. Di rojanê peyên ê festîvale do dewa Amara ya girêdayeyê qezaya Xelfetî ya Riha de çalakî û programî bêrê kerdene. Birayê Rayberê Şarê Kurdî Abdullah Ocalan, Mehmet Ocalanî vengdayîşê beşdarîya 4ê Nîsane şarê kurdî rê kerd û vat: “Ma bi saya Serek Apo û embazanê ey çinbîyayîşê kultur, ziwan û hunerî kewtê estbîyayîşî. No estbîyayîş zî wina xover nêbi, bi zor û zehmetî û bi bedêlanê giran bi.”
‘Wa her kes erjanê xo rê wayîr vejîyo’
Mehmet Ocalan bi munasebetê 4ê Nîsane rojbîyayîşê Rayberê Şarê Kurdî Abdullah Ocalanî vengda her kesî ke bêrê Amara û wina vat: “Ma vengdanê her kesî ke beşdarê festîvale bibê. Verê ke no têkoşîn dest pêbikero ma kurdan her çîyê xo xo vîr ra kerdbi. No têkoşîn nêbîyêne nika no kultur û ziwan orte ra amebi hewanayene. 50 serrî ra ver ma nêzayêne ke ma kurd ê. La çîyo ke vera kurdan yeno kerdene, nêyeno qebulkerdene. Ma vengdanê heme embaz û dostanê xo ke nê erjan rê wayîr vejîyê.”
‘Ziwanê xo ra durkewtiş tehlukeyêko pîl o’
Erjanê ke têkoşînî afirnayê, înan ser o Mehmet Ocalanî îfade kerd ke nê erjan rê wayîrvejîyayîş berpirsîyarîya her kesî ya û wina domna: “Ewro kurd û Kurdkî est ê. La xeylê kurdê ma ziwan û kulturê xo ra dûrî kewtê. Embazê ma yê ke mîyanê kar û xebatan de yê, ê zî zafane bi ziwanê xo qisey nêkenê. Ê ke kurd ê û bi ziwanê xo qisey nêkenê, zaf bîyê. No seba ameyoxê kurdan çîyêko bi tehluke yo. Kurdêko ke hurmet nêdo ziwan û estbîyayîşê xo, ma zî hurmet nêdanê înan. Ma tîya ra vengdanê heme şarê xo yê welatperwer ke wayîrê kultur, ziwan û erjanê xo vejîyê.”
