Rojnameger Merwan Ozdemîr û Alî Ammar mesajê Rayberê Şarê Kurdî Abdullah Ocalan ercnayî û vatî: “Ma bi nê mesajî dîyî ke ruhê xoverdayîşî ganî yo. No vengdayîş do rayîrê ma roşn bikero. Merasîmê çekronayîşî xeylî tarîxî yo.”
Rayberê Şarê Kurdî Abdullah Ocalan diyin vengdayîşê tarîxî yê çekronayîşî gerîlayan ra kerd. Dima vengdayîşê Ocalanî yeno vindertiş ke roja 11ê Temmuze komêk gerîla şaristanê Silêmani yê Kurdistanê Başûrî de merasîmê çekronayîşî ya zî veşnayîşê çekan bi beyanatêkî raya pêroyî biresno.
Vengdayîşê tarîxî yê Abdullah Ocalanî çapemenîya Kurdistan, Tirkîya û Dinya de veng da. Peynîya vengdayîşî nika zî çimanê heme dinya ser merasîmê çekronayîşî de yo.
Rojnameger Merwan Ozdemîr ke Kurdistanê Başûrî de rojnamegerî keno û rojnameger Alî Ammar mesajê Ocalan û merasîmî ercnayî.
‘Bandorê ci ya ser şarê kurdî rayêko bîn ame dîyayîş’
Merwan Ozdemîr dîyar kerd ke mesajê Rayberê Şarê Kurdî Abdullah Ocalan sey ‘mizgînîya peynîya 27 serran’ vîneno û wina va: “Na mizgînîya bi dîmen û vengê Rayber Apoyî resayo şarê kurdî, bêguman zerrîya her kurdêkî de hîsanê xorîn viraşto. Hîsanê ke na game zerrîya mi de virazîyenî, şayî, hêvî û qerardarîya nîşan dano. Şayî ya, seba ke peynîya hende serranê tecrîdî, hewna vengê ci ame hesîyayîş. Hêvî ya, seba ke na yew nîşanê na yewe ya ke têkoşînê şarê kurdî hema zî bi qewet verdewam o. Rayber Apo, sey sembole têkoşînê azadîya şarê kurdî, bi serran a binê tecrîdê giran de yo. Bi bandorê şerê taybetî nêmendo, ya zî waştî nê fikaran mîyanê şarî de aver bibî la mesaj nîşan da ke ruhê xoverdayîşî hema zî ganî yo.”
‘Siba rojêka tarîxî ya’
Ozdemîr destnîşan kerd ke peynîya vengdayîşê Abdullah Ocalan çimê her kesî ser merasîmê komêk gerîla yo û wina domna: “Serek Apo vengdayîşê xo kerd, nika ma benda nê merasîmê gerîlayan ê. Sey endamanê çapemenîya azade, ma seba na roje hadre yê. Merasîmê sembolîkî ra zafêr ya avzel no yo ke na kom mesajêk senî biresno? Eya, no dem tarîxî yo. Eke bibo nesîb ma şahîdîya na roje bikerî. Waştişê mi heme şarê ma no yo ke nê rojanê avzel de çimê her kesî ser çapemenîya azade bo.”
Ammar: Bi vengdayîşê peyênî ma kewtê qonaxêko newe
Rojnameger Alî Ammar o ke Kurdistanê Rojawan û Başûrî de xebityeno zî dîyar kerd ke peynîya 26 serran raya yewine veng û renge Rayberê Şarê Kurdî Abdullah Ocalan ame hesîyayîş û dîyayîş û wina domna: “Helbet na yew xeyalê bi serran bi, hem seba şarê kurdî hem zî seba dostane şarê kurdî. Rayber Apo temsîlîya xeylî û xetêkî keno, peynîya hezar serran Rayber Apo estbîyayîşê şarê kurdî mend kerd. Verê ke Rayber Apo bikewo dewre, daxîlî prosesî bibo krîzê mîyanê cuyaye estbî asta tewr cor. Rayêko bîn qewetê çareserî yê Rayber Apo nîşan da. Rayber Apo vano ke êdî çek bi temamî bêrê vindertiş û sîyasetê demokratîkî bikewro dewre. Do şerê çekdarî yê 50 serran bi deste Rayber Apo bi peynî beno. Têkoşîn do verdewam biko la çek werte ra bêrê hewanayîş.”
