Selahattin Demîrtaşî seba Sirri Sureyya Onderî mesaj pare kerd û vat: “Zerrîya ma to reyde ya kekê Sirri.”
Endamê Heyetê Îmralîyî yê DEM Partî Sirri Sureyya Onder vizêr şewe krîzê qelbî vîyarna û ey berd nêweşxane. Onderî badê emelîyeta ke 12 saetan berd odeya pawitişê awarte. Tehlukeya cuya Onderî ser o dewam kena.
Hemserekê verênê yê HDP’yî Selahattîn Demîrtaşo ke Hepisxaneyê Edîrneyî de girewte yo, seba Sirri Sureyya Onderî mesajêk pare kerd.
‘Ma to ra hes kenê kekê Sirri’
Mesajê Demîrtaşî yo ke hesabê ey ê medyaya dîjîtalî ser o ameyo parekerdene wina yo: “Qasidîya aştî karêko zehmet o. Heme kerdişê hesabanê sîyasîyan ra dûrî; seba ke ma û pîyê derdê domananê xo nêancê, ti zerrîya xo danî orte la zaf reyan qedrê nê nêyeno zanayene. Her rexne û êrîş yenê to ser, zerrîya to dêjnenê, wazenê rûmetê to reyde kay bikerê. La eke ti zerrîwazê aştî bî, ti gamêk apey nêerzenî, ti qet tira fek veranêdanê. Waştişê to yo yegane o yo ke mergî ra ver aştî bivînî.
Kekê Sirri zîyaretê xo yê peyêne yê hepisxaneyî de nişka ra eciz bî, rengê ey sipî bî û qelbê xo tepîşt. Ma tersayî, ma waşt ke veng bidê doktorî, ambûlansî la ey destûr nêda. Vejîya korîdorî û biney hewayo pak girewt û ame. Çimê ma, Ahmet Turk û Pervîn Buldan bîyê pirê hêsiran, a odeya hurdîleke de bi zehmetîya qiseykerdişê aştî ser o ma qurtîyayî. Kekê Sirrî agêra hewl da ke reyna a keyfeweşîya xo ya ke her wext mojneno û vat: ‘Kekê Ahmet heta ke ma na meseleya aştî hel nêkerê, merg çin o ha!’ Uca de ma soz da yewbînan û va ‘Verê aştî, merg zî emrê homayî yo.’
Kekê Sirri bi ê halê xo vejîya teber û verê Hepisxaneyî Edîrneyî de beyanatê ‘destê ma zerrîya ma ser o ma gêrenê’ da ke raştîya xo de wina bî. Kurd-Tirk wa her kes bizano ke no lajê zerrîgird ê şarê Tirkî seba aştî zaf zaf xebitîya, zaf emek da, qet erzan nêfikirîya. Zerrîya ey zaf hêrîşan ra, heqaretan ra mend la reyna goş nêda û bi îsrar rayîrê aştî de rayîrî ra şi. Coka qedr û qîmetê ey zaf gird o.
Do kekê Sirri wirzo lingan ser o, na aştî do teqez biba û înşela demî de do bi serbilindîyêka gird bi keda xo serfîraz bo. Ti yew ê înan ra yî ke nê tewr zêde heq kenî kekê Sirri; dua û zerrîya ma to reyde yê. Ma to ra hes kenê kekê ma yo erjaye.”
