Pîrozkerdişê Newroza Stenbolî ya 2011î de Mesajê Rayberê Şarê Kurd Abdullah Ocalanî ameye wendene. Mesajê Abdullah Ocalanî de ame vatene ke polîtîkaya înkar û îmhayê ya 85 serran bi ray û metodanê cîyayan hema zî dewam kena.
Pîrozkerdişê Newroza 2011î ya Stenbolî de ke 700 hezar kesan ra zede şar beşdar bîbî û bi hezaran posterê Rayberê Şarê Kurd Abdullah Ocalanî ameyî akerdene. Reyna pankarta “Me vera Dehaqan ke Kawa yê” akerde. Zaf nokteyê Newroze de adirê pîrozkerdişî ame viraştene. Pîrozkerdişî de avûkatê Buroya Huqûqê Asrinî, Mesajê Rayberê Şarê Kurd Abdullah Ocalanî yê seba Newrozî wend. Demo ke mesaj ameye wendene, şarî bi yew vengî dirûşmeyê “Bijî serok Apo” berz kerdî. Mesajê Rayberê PKK’yî Abdullah Ocalanî de wina ame vatene: “Tarîxê Cumhurîyeta Tirkîya yê 85 serran tarîxê qirkerdişî yo. Ewro zî na polîtîka bi reng û metodanê cîya-cîyayan dewam kena. Têkoşînê şarê kurdî rastîyêk eşkera kerde. Bi nê têkoşînê şarê kurdî êdî kes nêeşkeno nasnameyê şarê kurdî înkar bikero. La problemê estbîyayaîşê şarê kurdî hema zî dewam keno. Ma wazenê Neteweya Demokratîk awan bikê. Ma wazenê xoserîya demokratîk awan bikê. Ma wazenê heme rengî, ziwanî û kulturî binê banê xoserîya demokratîke de bîyarê têhet. Seba çareserîya problemê kurdî ganî muzakere aver şêrê. Serra 2011î do bibo serra averşîyayîşê çareserîye. Eger ke no metod aver nêşêro do demê dîyinî yê serra 2011î bibo destpêkê serewedaritişê şarê kurdî. La wa no çî baş bêro zanayene ke no metodê dîyin waştişê ma nîyo. Ma wazenê problemî bi metodanê dîyalog û muzakereyan çareser bikê.”
‘Newroze ameyoxê azadîya şaran a’
Abdullah Ocalanî, Mesajê xo de waşt çarçewaya yewîya demokratîkî de her kes piştî bido çareserîya problemê kurdî. Abdullah Ocalanî, dewamê Mesajê xo de waşt ke her kes bi hîsgirî nêzdîyê Newroze bibo û wina dewam kerd: “Tirkîye de çareserîya problemê kurdî yeno manaya statuyê kurdanê Îran û Surîye. Newroz do Tirkîye û Rojhelatê Mîyanênî de bibo azadîya şaran.”
