Mesajê Rayberê Şarê Kurd Abdullah Ocalanî yê Newroza 2026an meydanê Newroze yê Amedî de hetê Veysî Aktaş û Medya Aslan ra ame wendene. Ocalanî vat: “Ewro êdî pelêko newe ameyo akerdene. Rayîro ke şarê na cografya tede azad û pîya biciwîyê, ameyo akerdene.”
Newroza emserî bi hêvîya aştî û demokrasî bi sloganê “Newroza Azadî û Yewîya Demokratîk” sere de Kurdîstan de û zaf cayanê dinya de çend rojî yo yena pîrozkerdene. Newroza Amedî zê her serre emser zî sey fînal yeno pîrozkerdene.
Şarê Kurdî nê prosesê neweyî yê aştî û demokrasî de paweyê mesajê Rayberê Şarê Kurdî Abdullah Ocalanî bî û mesaj hetê sîyasetmedar Veysî Aktaş û aktîvîsta TJA Medya Aslane ra ame wendene. Mesaj de wina ame vatene: “Nika pelê nimiteye yê tarîxî yenê akerdene, îmkanê aştîya mîyanê şaran û miletbîyayîşê demokratîkî zêde beno. Tradîsyonê dewletî yê Sunnî û Şîîyan, tradîsyonê neteweperestî ra heta ke bêrê fekveradayene, yewbîyayîşo azad ê mîyanê şaran zî mumkîn beno.”
Temamê mesajê Rayberê Şarê Kurd Abdullah Ocalanî wina yo:
“Destana Newroze, sey roşanê newerabîyayîş, xoverdayîş û wisarê şaranê Rojhelatê Mîyanênî bi hezaran serrî ameye pîrozkerdene.
Sembol û kesayetê ke Newroze de yê, ruhê na cografya mojnenê. Dehaq tîmsalê sîstemê medenîyetê bidewlete yo; marê ke her roje mezgê di ciwanan wenê, wehşeta dewleta Asûrî, cisîmbîyayîşê xoverdayîşê Kawayê Asinkarî yê vera zilmî yo.
Newroze, ruhê xoverdayîş û newerabîyayîşê şaranê ma gandar kerdo.
Rojhelatê Mîyanênî de bi hezaran serrî yo ke şerê dîn-mezheb û kulturî dewam kenê û no darbeyo tewr gird o ke kulturê pîyaciwîyayîşê şaran ser o ameyo kerdene. Her nasname, her bawerîye xo ancena mîyanê qaşikê xo û ê bînî dişmen kerdişî reyde estbîyayîşê xo bidomno, mabênê şaranê ma de tirrê mîyanê şaranê ma hende xorîn beno. Erjê ma yê hemparî, kulturê ma yê hemparî yenê çinhesibnayene, cîyayîyê ma benê sebebê şerî.
Ewro êdî pelêko newe ameyo akerdene. Rayîro ke şarê na cografya tede azad û pîya biciwîyê, ameyo akerdene.
Aktuel de herême de bi îsrar ramitişê polîtîkayanê kehenan, felaketî xo reyde ardo. Proseso ke ma 27ê sibate 2025î de da destpêkerdene, goreyê bingeyê yewbîyayîşêko ke ruhê Newroze newe ra gandar bikero.
Sîyasetê teda, çinhesibnayîş û dişmenkerdişî ke bi taybetî Rojhelatê Mîyanênî de ameyo kerdene, cîyayîyê ke viraştî çi heyf ke ewro seba mudaxeleyanê emperyalîstan zî baxane virazeno.
Nika pelê nimiteye yê tarîxî yenê akerdene, îmkanê aştîya mîyanê şaran û miletbîyayîşê demokratîkî zêde beno. Tradîsyonê dewletî yê Sunnî û Şîîyan, tradîsyonê neteweperestî ra heta ke bêrê fekveradayene, yewbîyayîşo azad ê mîyanê şaran zî mumkîn beno.
Wexto ke dewletanê Ewropa waşt ke şerê dîn-mezhebî yo ke 300 serrî dewam kerdo bi Peymana Westfalya ya 1648î biqedênê, Rojhelatê Mîyanênî de ameyîşê nê pêkewtişan heta ewro şaranê ma rê trajedîyê xorînî dayê tecrubekerdene. Ewro ma îmkanê ke kultur û bawerîyî reyna pîya biciwîyê, girewt xo dest. Kaoso ke Rojhelatê Mîyanênî de yeno waştene ke bêro awankerdene, ma şênê bikerê wisarê şaran. Trajedîyê ke yeno waştene ke ma bivînê, ma şênê eksê ci bikerê û bikerê warê azadîya şaran.
Seba naye ganî ma bawer bikerê ke kultur û bawerîyî şênê pîya biciwîyê, fehmê neteweperestî yê tengî ra bivîyarê û bingeyê entegrasyonê demokratîkî ser o bibê yew û pîya est bibê. Senî ke tarîxê ma de yo, ewro zî ganî ma bizanê ke ma şênê pîya her tewir zordayîşê şerî, xizanîye û wehşetî binfînê.
Newroza 2026î, bi heme girsîya xo newekerdişê nê tarîxî ya. Tarîx beno nikayên, bingeyê kulturîya raştikêne ser o ver bi vînayîşê zîhnîyetî resayo îmkanêko gird.
Newroza 2026î kokanê xo ser o newe ra gandarbîyayîş; rayîrê demokratîkbîyayîş, entegrasyono demokratîk de bi hamleyêka girde beno nikayên; beno Newroze.
Heta nika Newroze bi erjanê sembolîkan pîroz bîyêne. Êdî Newroze ne xeyalêk, ne utopyayêk a, cuya komunal temsîl kena ke yena awankerdene û xurt.
Newroze, tam sey ke tarîx de yo, merkezê Rojhelatê Mîyanênî de giranîya xo ronena û newera gandar bena; sey entegrasyono demokratîk reyna heme herême de rolê xo kay kena. Nikabîyayîşêko wina gird beno, do wina dewam zî bikero.
Mana û hêzê Newroze, sey “nika” vejîyeno sahneyê tarîxî ser o. Newrozanê emserr û seranê ameyoxî manayê înan o winasîn est o.
Newroze, roja ke winasîn a ke ma bingeyê hem mana û hem fîzîkî ser o ma xo awan bikerê.
Newroze de, her tewir têkilîyanê qels, manayanê ke bes nêkenê, înan ra ke timûtim ma dima yê, ma xo îna ra pak bikerê, û bi tarzo ke têkilîyanê salihên, bi xorînîya manayî yo xurt; bi exlaqêko newe yê azadîye û bi fehmêko newe yê estetîkî giranîya xo bidê cuye.
Ma felsefayê “Jin, Jiyan, Azadî” heme têkilîyanê xo de pratîk bikerê, xo biresnê cuya azade. Êdî ma bizanê ke Newroze hêvî, xeyal yan zî teorîyêk nîya; ma êdî fehm bikerê ke gamêka pratîkbîyayîşî ya. Ma bi zîhnîyetêko xurt, bi xorînîya manayî ya xurt cewab bidê na gama pratîkbîyayîşî.
Bi munasebetê Newroze destê ma de yo ke ma emserr seba heme şaranê Rojhelatê Mîyanênî bikerê serra raştikên a azadîye û tradîsyonê dostîye û hemrayîya şaran serdest kerdiş destê ma de yo. Bi taybetî no parçebîyayîşo ke bingeyê nîjadî û dînî-mezhebî ser o yo, qedêndayîşê nê şerê waûbirayan; herinda ci de yewbîyayîşê heme kulturan, bawerîyanê dînî-mezhebîyan bingeyê azadî û waûbirayî ser o temînkerdişî reyde eşkenê biresê ney.
Ma nêverdê ke Rojhelato Mîyanên ke herêma viraştişê kulturî ya, destê hêzanê hegemonîkan de bibo warê şerî. Senî ke tarîx de yo, ewro zî no kulturo gird xo azad û bingeyê nasnameyê raştikênî ser o îfade kerdişê ci, yewbîyayîşê ci vernîya astengîyan de ma şênê pîya vinderê. Ma nêweşîya neteweperestî û mezhebperestî apey verdê û tradîsyonê hemrayîya tarîxî ya bi hezar serranê şaranê xo esas bigîrê, tu astengîya ke ma nêşênê vîyarê, çin a.
Vera rijîyayîşo gird ê komelkî û ekolojîkî ke modernîteya kapîtalîste bena sebeb, çareserîya sîyasetê demokratîke, ekolojîk û azadîya cinîyan a modernîteya demokratîke ma bi ruhê azadîya Newroze xurt kerde.
Bi ruhêko wina yew, mumkin o ke ma sîyasetê demokratîkî bikerê dîyarî. Eke ma wazenê ke têkoşînê bi hezar serran ê bindestan bi serkewtişêk tacîdar bikerê, cayê ci Rojava de, Rojhelat de, warê kulturê kapîtalîstî de nê, warê azadîya raştikêne ya Rojhelatê Mîyanênî de şêno bivînîyo. Nê herran de caardişê entegrasyono demokratîk o raştikên, bingeyê merdimîya newîye, waûbirayîye, hemrayîye û dostîye ser o caardişê reyde bi hewayêko raştikên ma eşkeno bêro newekerdene.
Emserr Newroze bi manayê xo yo raştikên sey “Roja Newîye” erjê pîrozkerdişî girewto.
Ma wazenê ke Newroza 2026î biba wesîleyê rayîrşîyayîşê bêemsal ê serranê ameyoxî; ez heme şaranê ma rê aştî hêvî kena.
Reyna Newroza 2026î reya ewile bi ruhê entegrasyonê demokratîk, aştî û waûbirayî yena pîrozkerdene ke yenê ca. Ez bi heme hêzê xo beşdarê nê ruhî û nê îradeyî bena, şima hemînan bi heskerdişî selam kena.
21ê Adara 2026î
Abdullah OCALAN”
