Sîyasetmedaran dîyar kerd ke proseso ke vengdayîşê Rayberê Şarê Kurdî Abdullah Ocalan ra dima dest pêkerdo, Başûr de bi merasîmê çekverdayîşî resayo safhayêka newîye û hinî mesuldarîye kewena milê dewlete ser.
Vizêr komêka gerîlayan bi merasîmêkî eşkerayîye daye û çekê xo vêşnayî. Bi nê hawayî proseso ke vengdayîşê Rayberê Şarê Kurdî Abdullah Ocalan ra dima dest pêkerdo, Başûr de bi merasîmê çekverdayîşî resa safhayêka newîye. Sîyasetmedaran ANF’yî rê qalê merasîmî kerd.
Serekê Rûmetî yê HDP’yî Ertugrul Kurkçuyî pare kerd ke no merasîm gamêka tarîxî bîyo û vat: “Vêşnayîşê çekan îradeyê Abdullah Ocalanî eşkera kerd. La mesele na ya ke hema têkilîyê mabênê dewlete û Abdullah Ocalanî û mabênê kurdan û Tirkîya formatêkî ser o ronêniştê. Ganî bi têkoşînê sîyasî û dîyalogan mesele formatêkî ser o bêra çareserkerdene. Têgêrayîşê kurdan ganî bi paştdayîşê şarî warê sîyasîyî de hîna merkezî bibo.”
Zanyarê sîyasetî Mehmet Zahîr Saritaşî vat: “Merasîmê çekvêşnayîşî astêka tarîxîye bi. Na çalakîya sembolîke tena nîşaneya nîyetê holî ney heman wextî de qerardarîya kurdan a seba haştîye û çareserîya demokratîke mojnaye. Têgêrayîşê kurdan bi îmtîhanêkê pîlî, îradeyêkê xurtî û amadekarîya pêroyî resayo na aste û mesuldarîyêka cidîye girewte xo ser. Hinî ganî dewlete bê ke erey bibo gaman bierza. Ganî Meclîs de cade komîsyonêk bêro awankerdene.’’
Hemserekê DBPyî yê Wanî Cemal Demîrî vat: “Bi îmhakerdişê çekan îradeyêko xurt ame mojnayene. Na noqta de faktoro dîyarker seba averşîyayîşê prosesî tewirê dewlete yo. Hêvîya kurdan na ya ke dewlete nê firsendê tarîxî bişuxilna û cewabêkê pozîtîfî bida. Averşîyayîşê prosesî seba çareserîya mende do pêkerdişê komelkîyî û îradeyê cuya hempare xurt bikero.’’
Akademîsyenê Zanîngehê Zurichî Toros Korkmazî vat: “Îmhakerdişê çekan qewimîyayîşêko tarîxî yo. No îlankerdişê îradeyî yo. Na gamêka sembolîke bîya. No proses bi dîyalogan do dewam bikero. Xurtkerdişê zemînê sîyasî û caardişê reformanê qanûnîyan girîng o. Eke reformê sîyasî û qanûnî nêrê kerdene têkoşîno çekdar beno ke newe ra do dest pêbikero.’’
Sîyasetmedar Hişyar Ozsoyî vat: “Mesajanê Ocalanî û çalakîya sembolîke ya PKKyî îradeyêk û qerardarîye eşkera kerdî. Hetê kurdan seba haştîye û sîyasetê demokratîkî amade yê. Ganî îqtîdar hinî tewirê xo zelal bikero. Ma hêvî kenê ke prosesêko newe do dest pêbikero. Ganî rayîrê sîyasetî bêro akerdene. Nika ra pey do waro sîyasî yo newe vejîyo werte û mesele do çareser biba.’’
