Nuştox Mehmet Takir kitabê xo yê “Zinarên Lanetkirî” ser va ke no kitab ser ci de şopêko gird veradayo û va: “Kitab de meseleyê ke vîyarenê heme ameyî cuyayîş. Mi zî waşt bi nuştişê nê kitabî, nê meseleyan biresno neslê nikayin rê. Mi waşt trajeyî ke ameyê cuyayîş wa bêrê zanayîş.”
Nuştox Mehmet Takir serranê ci yê gedeyî û ciwanî Amed de derbas bî. Serra 1980î de demêko 18 serra, hîna ciwanêk bî ame hepskerdiş. 20 serrê hepis de mend û 12 hepisxane ra zî ame surgunkerdene. Serra 2000î de hepis ra vejîya û nika Amed de cuyeno. Mehmet Takir kitabê Tinda û Zinarê Lanetkirî nuşto.
Kitabê Mehmet Takirî yê “Zinarên Lanetkirî” sey formatî tîyatro ameyo nuştiş. Nuştox Mehmet Takir kitabê xo yê “Zinarên Lanetkirî” ser o ajansê ma rê qise kerd.
Temîr Axa karakterêko zilmkar o
Nuştox Mehmet aşkera kerd ke o kitabê ‘Zinarên Lanetkirî’ pergalê axayî ser nuşto, çimkî her dem de axayêko zilimkar vejîyayo werte û wina va: “Xususî Cografyaya Kurdistanî de axayan her tim bi hetkarîya dewlete zilm kerdê. Xususî Kitab de behsê zilmê Temîr Axa yeno kerdiş, çimkî Temîr Axa bi hetkarîya Qaymeqamê Dewlete şarî ra zilm keno. Temîr Axa qezaya Pîranê Amedî de yeno naskerdene. Temîr Axa, peynîya demê awanbîyayîşê Komare de cuyayo.”
Dapîra mi, mi ra behs kerd
Mehmet Takir destnîşan kerd ke dapîra ey, ey bi estanekê Temîr pîl kerda û her tim behsê zilmê Temîr Axa kerda û wina domna: “Temîr Axa vejîyayo ser Koya Homayî û yaverê xo ra vato: Nê heme warê heqayî, ê mi yê. Zaf merdimêko destpot û zilmkar bîyo. Zilmê xo zî çi heyfo ke bi hetkarî qeymeqamî kerdo. Mi xususî no demî bido cuyayîş, no ser xususî estaneka Temîr Axa girewt dest û nuşt. Dapîra mi demo nêzd de rahmet kerd la estanekê ci hema zî vîra mi de yê, çimkî dapîra mi Qetilkerdişê Şêx Seîdî zî dî bî.”
Sey tîyatroyêk mi nuşt
Takir ard ziwan ke estaneka Temîr Axayî, kitab de sey tîyatroyêk nuşto û wina dewam kerd: “Kitabê Zinarê Lanetkirî eynî demî de tîyatroyêk o, mi no kitab hepis de nuşt. Mi demo ke hepis ra vejîya, seba nuştişê kitabî mi embazê pisporî ra zî hetkarî girewt. Kitab de xususî mi behsê Çeto û Mîrî zî kerd. Çeto hîna derguş de niqirê Kejê yo. No semed ser wazeno Kejê reyde bizewijo la Kejê aşiqê Mîrî yo. Çeto hesûdî ra bi kayêk Mîr qetil keno û pîyê Kejê na qewimyayîşî ra beno şahîd. Kitab de na trajedî ra zî yeno behskerdene.”
Yewîyeya dewijan çin a
Takir wina qedîna: “Çi heyfo ke qeza de qeymeqam sey temsîlkarê dewlete yo û no dem qeymeqam hetkarî dayo Temîr Axa rê û qeymeqam qet şarî dîqetê verçiman nêgirewto. Temîr Axa zî bi hetkarîya qeymeqamî awa dewijan, herikneno heqayanê xo û peynî zî têkoşînê dewijan destpê keno. Temîr Axa, pîyê Îso bi ganî veşnayîş de qetil keno. Çi heyfo ke yewbînangirewtişê dewijan çin o, hetta yewbînan ra îxanet kenê. Tena Xal Seydo, wazeno dewijan paştî yewbînan bigê, wendiş û nuştişê Xal Seydo zî çin o. Karakterê Kejê û Mîrî zî no dem şîyê wendegehî, têkoşînê dewijan polîtîk nîyo. No kitab ser mi şopêko gird verada, çimkî nê kitab de meseleyê ke vîyarenê heme ameyî cuyayîş. Mi zî waşt bi nuştişê nê kitabî, nê meseleyan biresno neslê nikayin rê; mi waşt trajeyî ke ameyê cuyayîş, wa bêrê zanayîş. Çapê hîreyin ê kitab de projeyê mi yê sewbî yê balkêş est ê.”
