Aktîvîsto Galîçyayij Mîguel Paz ke hemverê serdestîya Îspanyayî seba heqanê Galîçyayijan têkoşîn keno, vat ke ê têkoşînê şarê kurdî nêzdî ra taqîb kenê û vat: “Ma şaranê bindestan reyde mîyanê piştîdayîşî de yê. Bi taybetî seba ke heqanê xo bigîrê û ameyoxê xo dîyar bikerê ma hetê şarê Kurdîstanî de yê.”
Mîguel Paz ke endamê Sendîkaya Mamosteyanê Îspanyayî yo, bi munasebetê 21ê sibate Roja Ziwanê Dayike ya Dinya amebi Anqara û sey qiseykerdox beşdarê Sempozyûmo Mîyanneteweyî yê Ziwanê Dayike yo 6. bi ke hetê Sendîkaya Karkeranê Perwerdeyî û Zanistî (Egîtîm Sen) ra amebi organîzekerdene.
Galîçya zî sey Kurdîstanî wayîrê tarîxêko kehenî ya û zaf reyî ameya îşxalkerdene. Mîguel Paz sempozyomî de tecrubeyanê Galîçyayî ser o qisey kerd û vat ke rîyê zextanê dewleta Îspanyayî ziwanê înan hemverê vindîbîyayîşî de yo.
“Ma wazenê ke heme şarê bindestî heqanê xo bigîrê”
Mîguel Pazî wina dest bi qiseykerdişê xo kerd: “Erdê dinya ser o waştişê ma o yo ke heqê heme şaranê bindestan bêro dayene. Neteweyê Yewbîyayeyî vanê ke ganî her milet ameyoxê xo dîyar bikero. Şarê kurdî zî seserrî yo ke seba heqanê xo têkoşîn keno. Ma şarê kurdî reyde mîyanê piştîdayîşî de yê û wazenê ke şarê kurdî bireso heqanê xo.”
“Ma têkoşîna şarê kurdî taqîb kenê”
Mîguel Pazî dîyar kerd ke ê zî dûrî ra têkoşînê şarê kurdî taqîb kenê û wina vat: “Bi hezaran girewteyê kurdî ke seba heqanê xo têkoşîn kerdo, zindanan de yê. Çi heyf ke derheqê prosesê de ke dest pêkerdo, ma zaf xeberdar nîyê. La ma wazenê ke nê prosesî de şarê kurdî bireso heqanê xo. Şarê kurdî se wazeno ganî qerarê ey zî şarê kurdî bido.”
“Ganî şarê bindestan mîyanê piştîdayîşî de bibê”
Mîguel Pazî peynî de bale ante hêrişanê vera Rojava ser o û vat: “Hemverê hêrişanê vera Rojava de şarê kurdî her ca de vejîya qadan û xoverdayîşî dest pêkerd. Sendîkaya ma zî piştîdayîşê nê xoverdayîşan kerd. Hemverê bêedaletîye piştîdayîşê bindestan, piştîdayîşê sinifa karkeran muhîm o. Ê yê ke wazenê Galîçya û Katalonyayî çin bikerê zî nê kesî yê. Eyn sîstem hemverê heme şaranê bindestan nê tedayan keno. Coka piştîdayîşê şaranê bindestan hemverê nê burjuwazîyan muhîm o.”
