Hemserokê Meclîsa Kantona Efrîn-Şehbayî Mihemed Şêxo dîyar kerd ke, semedê hêrîşanê dewleta Tirk û grûbanê aye yê paramîlîteran welatîyê Kurdî reya diyîne bêçare mendî ke macir bibê
Hemserokê Meclîsa Kantona Efrîn-Şehbayî Mihemed Şêxo dîyar kerd ke, semedê hêrîşanê dewleta Tirk û grûbanê aye yê paramîlîteran welatîyê Kurdî reya diyîne bêçare mendî ke macir bibê û wina vat: “Ganê raya pêroyîye ya dinyayî seba qedînayîşê na barbarîye têbigêra.”
Bi hêrişê Tehrîr El-Şam (HTŞ) û tayî grûbanê bînan ê 26ê Teşrîna Peyêne de rejîmê Esadî werte ra wedarîya. Nînan reyde Tirkiye û grûbê paramîlîter ê girêdayeyî aye zî hêrişê Vakur û Rojhilatê Sûrîyeyî kerd. Sîvîlî ke wextê hêrişê Tirkîyeyê yê serra 2019ê yê Efrînî ser o şîyê Til Rifat û Şehba reyna bêçare mendî ke koç bikerê.
‘Sîvîlî yenê hedef girewtene’
Şêxo da zanayîş ke hembend û hereketê sîyasî yê ke serra 2019î ra Sûrîye de ameyê kerdene bi amancê qelskerdişê rejîmê Sûrîye yê û vat ke tewr zaf sîvîlan zerar dîyo. Şêxo bal ant hêrîşanê grûbanê paramîlîter yê dewleta Tirk ser o ke tewr zaf sîvîlan hedef gêna û ard ziwan ke na rewşe reyna şarî bêçare verda ke macir bikerê. Şêxo vat: “Şarê ma yo ke bêçare mendo Efrîn ra koç bikerê Til Rifat û Şehba, nika reyna raştî koçberîye yeno. Hêvîya înan a ya ke rojêk reyna agêrê Efrîn.”
‘Ganê raya pêroyîye ya dinyayî seba qedînayîşê na barbarîye têbigêra’
Mihemed Şêxo ard ziwan ke hûmara maciran resaye 100 hezar kesî. Şêxo vat ke: “Rayberîya Xoser seba bicakerdişê welatîyan zaf hewl dana. Seba ke şarê ma serdî de nêmano, ma konan ronenê. Nê şerî de bedêlo tewr pîl şar dano. La şarê ma xo ver dano. Ganê sazîyê heqê merdiman û pawitoxê mîyanneteweyî hemverê nê wehşetî de bêhîs nêmanê. Şar mîyanê serd, vêşanîye û hêrişî de seba cuye xo ver dano. Ganê raya pêroyîye ya dinyayî na barbarîye bida vindarnayîş.”
