Munîh de Konferansî ra ver çalakîkeranê Îranî dest bi rayîrşîyayîşê şermezarkerdena Îranî kerd û bi yew vengî vatene: “Şahî rê ney, molla rê ney.”
Muxalîfanî rejîmê Îranî yê dîasporayî Munîh de ameyê têhet û Konferansê Munîhî ra ver çalakîya protestoyî viraşt. Çalakî de pankartêko gird ke ser o “Şahî rê ney, molla rê ney” nuştebi, ame akerdene.
Goreyê xebera Guardianî; girse peyê nê pankartê girdî de rayîrşîyayîş kerd û bêmabên sloganê vera rejîmê Îranî û vera zihnîyetê Şahî vatê.
Çalakîkeran bi şewqe û êleganê xo yê zerdan bale ante serê xo. Her çend propagandaya seba lajê şahê verênî yê Îranî Riza Pehlevî yena kerdene zî kesî destek nêda û qadan de sloganê “Şahî rê ney, molla rê ney” ameyê vatene.
Yew pêşengê çalakî vera şarî qisey kerd û dîyar kerd ke şaranê Îranî ne dîktatorê sey şah û ne zî dîktatorê sey molla wazenê. Çalakîkeran waşt sey sîstemê rejîmê Îranî, lajê şahê verênî yê Îranî Riza Pehlevî zî tewrê konferansê Munîhî nêbo.
