Seba ke ciwanî û domanî teşwîq bikerê ke ziwanê xo yê dayike de muzîk bikerê, Alzey de musabeqaya vengî ya Kirmanckî ameye organîzekerdene. Bi munasebetê Roja Ziwanê Dayike ya 21ê Sibate ra Almanya de bajarê Alzey de na musabeqa bi mêmandarîya Cemxaneyê Pîr Sultan Abdalî ameye kerdene.
Musabeqa de yewinîye Lara Bogus Erel girewte, dîyinîye Munzur Ozturkî, hîrêyinîye zî Yaren Yeşîl girewte. Musabeqa de di domanî, hîrê ciwan û 12 pîlan ca girewtbî.
Endamanê jûrî de Sena Dêrsimî, Ferhat Tunç, Zele Mele û Ozan Rençber est bî û bi erjnayîşanê xo ciwanan rê cesaret û motîvasyon da.
Rolê keyeyan dîyarker o
Ozan Rençberî vat ke wayîrvejîyayîşê ziwanê dayike berpirsîyarîyêka girs a û nê karî de rolê keyeyan dîyarkerd o. Sena Dêrsimî bi kirmanckî qisey kerd û vat ke ziwanê dayike nîmeto tewr gird o ke dayîke ra yeno û unsuro tewr muhîm ke têkilîya dayîke-domanî pêt keno, ziwanê dayik o. Bi taybetî cinî û ciwanan ra waşt ke xebatanê kulturî de hîna zaf ca bigîrê ke muzîkê tradîsyonelî û ziwanê dayike resnenê pê.
Her ciwan gilê de hêvîye yo
Ferhat Tunçî bale ante ser ke ziwanê kurdkî ser o zordarîya sîstematîke est a û vat ke ziwanê dayike de kerdişê muzîkî cesaret wazeno û ganî no cesaret bêro nirxnayene. Zele Mele vat ke ciwanî esteyê ziwanê dayik ê û “her ciwanêk gilêkê hêvî yo. Seba ke gilê dare pêt bimanê ganî kokê ci pêt bibê. Kokê ma zî ziwanê ma yê dayik o.”
Her keye ganî bibo mektebêk
Şaredarî Alzey Steffen Jungî ehemîyetê ziwananê dayike ser o xurtkerdişê ferdî îfade kerd. Îdarekarê Herêma Alzey-Wormsî Heiko Sippelî eleqeyê ciwanan ê seba kultur û huner ser o qisey kerd. Serekê Cemxaneyê Alzeyî Haydar Vuralî vat ke her keye mektebêk o û ganî may û pîyî bi domananê xo ziwanê dayike de qisey bikerê.
Çarçeweya programî de tîyatroyo bi kirmanckî û Ekîbê Govendanê Tradîsyonî yê Cemxanayê Alzeyî zî sehne de bî. Nîşandayîşê tabloyan û fotoyan ke aîdê herêma Dêsimî yê zî reng da çalakîye.
Kesê ke ameybî, dîyar kerd ke ganî nê tewr pêameyîşê ziwanê dayike hîna vêşêr bêrê organîzekerdene.
