Şer û krîzê girdî herême de çend şinê zêdetir benê û şer verê keberê kurdan de yo. Wextêke de heme hetan vengdayîşê yewîye û pêroyîye kerde. Çiqas şino nakokîyê mabêne PDK, YNK û hetanê bînan zêdetir benê. Heto bîn ra şerê înan yê serê erk û menfîetan çi Herême û çi zî Bexda domdar o.
Wextêke de heme kurdî seba pawitiş û destkewteyan û vernîya girewtişê talûkeyanê îşxalkerî vengdayîşê yewîya neteweyî û pîyabîyayîşê partî û hetanê sîyasîyê kurdan kenê, partîyê sîyasî yê Herêma Kurdîstanî serê babetanê tewr qicekan zî yew nîyê. No zî tesîr ro heme kurdan keno venganîya mabênê kurdan zêdetir keno.
Nika PDK û YNK’yî serê erk û wezîfeyan şer kenê, hetê ke ra hayîya înan krîz û probleman ra nêmanena, heto bîn ra zî şarî bi nê karan meşgul kenê. Wextokî de kurdî her hetan ra bi dêsan û têlan ameyê dorpêçkerdene, binê qirkerdişî de yê, hetê Herêmê Kurdistanî dimayê menfîetanê xo yê ke seba hîn zêde îktîdar de bimanê.
No bî serre û 4 aşmî yo ke weçînayîşê Parlementoyê Herêma Kurdîstanî ameyo viraştene. Heta nika ne PDK’î ne zî YNK’yî erkê hukmatê newî yê Herême pêameyîş nêkerdo. Her het waştena wezîfeyanê zêdeyan keno. Nê zî kerdo ke herêm bikewo venganîyêke qanûnan û qanûno bingeyî. No zî name û vengê Herême zere û teber de nebaş dano mojnayene. Heto bîn ra îmkan dano Iraqî ke zêdetir Herême qels keno.
Nika zî erkê dewleta Iraqî vejîyayo vernîye û no yew zî nakokîyanê mabênê hetanê sîyasî ê herêmê kurdîstanî de taybetî mabênê PDK û YNK’yî de zêdeyêr kerdê. Nê her di partîyan hîrê namzetî seba erkê Serekkomarîye ke dinyaya kurdan de dayê mojnayene.
Kurdan pêro pîya 11 namzetê xo est ê. No zî bîyo sebeb ke neyarê kurdan henekanê xo bi kurdan bikerê, bi no hawayî ti hêz û giranîya kurdan Bexda de nêmaneno.
Erkê serekkomarîye bîyo problemêko zaf gird ke vernîya yewîya mabênê kurdan û Bexdayî de. Kurdî ne yewveng û yewrêzê. Her yewî namzetê xo seba erkî dayo mojnayene. No zî rewşa kurdan ya tewr qelse verva îktîdarê teberî û dinya dano mojnayene, bi taybetî zî mojnayîşê Iraqî dano.
No zî demê ke de Mesûd Barzanî bi xo zî na mesela ser mikûr ame ke nêeşka bi yewveng û yewrêzê bê. Eynê wextî de bêhevîkerdişê xo yê seba bicaardişê dano mojnayîş.
Nika Rojavayê Kurdistanî de çeteyanê Hukmatê Demkî ya Sûriye û Dewleta Tirkan xo amede kerdo ke seba Vakur û Rojhelatê Surîya hêrişan bikero. Heto bîn ra Vakurê Kurdîstanî prosesê Aştî û komelê Demokratîk est o, heta nika nêresayo amancê xo. Rojhêlatê Kurdîstanî de zî çalakîyî nerazîbîyayîşî est ê û rejîm bi hêzanê xo hêrişê çalakîkeran kenê ke bidê vindarnayene.
Wextêko winayîn de her wextî zaferî lazîmîya şarê kurdî bi yewîye û yewrêzê est a. Çi heyf ke hetê Başurê Kurdistanî serê erk û wezîfeyan de şer kenê û meşgulîyetê înan nakokî û şiktişê yewbînayê. Cayê çareserîyê probleman û başkerdişê cuya şarî, heme hêzê xo seba partîyanê xo bikar anê. Neyaranê kurdan reyde kom benê û munaqeşe kenê. Verva kurdan vindertê, la amede nîyê ke yewîya mabêne xo virazê.
