Hetkara Hemserekê Pêroyî yê Berpirsiyarê Rêxistinkerdişî ya DBP’î Narîn Gezgor mesajê Îmrali û rewşa Rojawanî ser o qisey kerd û wina vat: “Seba ke nê prosesê ra encamêko baş bêro girewtene ganî her kes sey Rêzdar Ocalanî samîmî bibo.”
Parlementerê Dem Partî Sirri Sureyya Onder û Pervîn Buldan 28ê Kanûne de Rayberê PKK’î Abdullah Ocalanî reyde pêvînayîşêk kerd. Heyet dima derheqê pêvînayîşî de fikrê Abdullah Ocalanî bi beyanêtêko nuştekî vila kerd. Abdullah Ocalanî pêvînayîşî de 7 nuqtayan ser o vindert û ard ziwan ke Tirkîya de wextê azadî, aştî û wa û birayîye ameyo.
No mesajê Abdullah Ocalanî hetê sazî, rêxistin û sîyasetmedaran ra yenê nîqaş kerdene û şîrove kerdene. Hetkara Hemserekê Pêroyî yê Berpirsiyarê Rêxistinkerdişî ya Partîya Herêman a Demokratîke (DBP) Narîn Gezgor hem derheqê mesajê Rayberê PKK’yî Abdullah Ocalanî de hem zî rewşa Rojawanî ser o Ajansa ma rê qisey kerd.
‘Ê ke rayîrşîyayîşê nê şerî dîyar bikerê şarê Kurd o’
Narîn Gezgor dîyar kerd ke ê ke nê şerî wazenê hêzê kapîtalîstî û wina vat: “Nika seke şima zî zanê Rojawanî de şerêk est o. No şer çend serrî yo dewam keno. No şero ke nika beno terefgirê ci şarê Rojawanî nîyo, şarê Rohelatê Mîyanênî nîyo, Cinîyî nîyê, hêzê demokratîke nîyê. Ê ke nê şerê wazenê hêzê kapîtalîst ê. Ma nika orteyê nê şerî de ca gênê. Hêzê kapîtalîstî zanê ke sîstemêko Rojawanî de awan bîyo dûştî înan alternatîfêk o coka hêrişê şarê Kurd kenê. Ma zî do hemverê nê hêrişan xover bidê û têkoşînê xo xurt bikerê. Ma eşkenê bi nê şeklê serbikewê. Ê ke rayîrşîyayîşê nê şerî dîyar bikerê şarê Kurd o.”
‘Hêrişê deskewteyanê cinîyan kenê’
Narîn Gezgor dîyar kerd ke hêzê ke nika hêrişê Rojawanî kenê hemverê sîstemê Rojawan yê demokratîk ê û wina dewam kerd: “Ewro rejimê Sûrîye seba ke rejîmêko demokratîk nêbi orte ra wedarîya. Şarê Rojawanî nika cuyêka azad, sey pê û demokratîk awan kerda. O semedî ra hêzê kapîtalîstî eslê xo de hêrişî nê sîstemî kenê. Sîstemêko demokratîk bi saya felsefeyê Rêzdar Ocalanî Rojawanî de ameyo awankerdene. No sîstem seba heme dinyayî nimûne yo. O semedî ra her kes bi taybetî cinîyî azadîya xo nê felsefeyî de vînenê. Hêzê selefîyê ke vejeyê orte heme çî ra ver hêrişê cinîyan kenê. No mojneno ke no zîhnîyet hemverê azadîya cinîyan o. Coka hêrişê cinîyanê Kurd û deskewteyanê cinîyanê Kurdan kenê. Ma do hemverê nê hêzî xover bidê û seba ney paştî bidê Rojawanî. Encamê nê şerî do têkoşînê şaran û cinîyan dîyar biker o.”
Tewrê nobetan benê
Narîn Gezgor seba paştîdayîşê Rojawanî wina qisey kerd: “Rojawan seba ma her kesî, seba cinîyanê Kurdîstanî, Tirkîyayî û dinyayî nimûne yo. Rojawanî rayîrê ma roşnî kerd û vernîya ma akerd. Coka ma do her tim wayîrê Rojawanî vejîyê. O semedî ra ma di cayan de nobetî dayê dest pêkerdene. Pirsûs û Nisêbîn de. Heme şarê ke Kurdistanî de ciwiyenê yenê tewrê nobetan benê. Uca de ma têkoşînî xo kenê yew.”
‘Bi şikîyayîşê tecrîdî ma eşkenê bibê azad’
Narîz Gezgor derheqê tecrîdo ke Rayberê PKK’î Abdullah Ocalanî ser o yo qisey kerd û wina vat: “Tecrîdo ke Rayberê Şarê Kurd Rêzdar Abdullah Ocalanî ser o yo heme ca de vila bîyo û heme komelan ser o tesîr keno. Bi taybetî cinîyan ser o tesîr keno. Seba şikitişê tecrîdî serrêk a ma kampanyayêk daye dest pêkerdene. Kampanyaya Azadîya Rayberê Şarê Kurd Rêzdar Abdullah Ocalan û Çareserîya Demokratîk a Meseleyê Kurd. Ma çalakîyanê cîya cîyayan kenê. Sey Rayîrşîyayîşê Azadîye. Raybertîya nê çalakîyan zî cinîyan kerd. Bi nê çalakîyan ma wazenê hemverê tecrîdî reaksîyonanê xo bimojnê. Çunke eke tecrîd bişîkîyo ma eşkenê azad bibê. Ma azadîya xo şiknayîşê tecrîdî de vînenê. Tecrîdo ke Rayberê Şarê Kurd Rêzdar Abdullah Ocalanî ser o yo ma nêeşkenê fikir û paradîgmaya ey ra cîya bigîrê dest. Hêzê kapîtalîstî fikranê Rayberê Şarê Kurd Rêzdar Abdullah Ocalanî ra tersenê. Ganî ma bi hêvî bibê û têkoşînê xo yê seba azadîya Rêzdar Ocalanî pîl bikerê.”
‘O eşkeno no mesele şerî ra ravîrno aştî’
Narîn Gezgora ke derheqê mesajê peyên yê Rayberê PKK’î Abdullah Ocalanî de wina vat: “28ê Kanûne de Rêzdar Ocalanî reyde pêvînayîşêk bi. Rêzdar Ocalanî bi hewt madeyan bi hewayêko samîmî rayîrê çareserîye mojna ma. Ey vat ke ‘ez eşkena şerêko Tirkîya û Rojhelato Mîyanên de qewimîyeno vindarnî. Hêzê mi est o.’ Pancês serrî ra ver Rayberê Şarê Kurd Rêzdar Abdullah Ocalanî fikrê xo ardî ziwan. Vatbi ke do şerê hirêyin yê dinyayî bibo. Ewro no şer xo nîşan dano. Paradîgamaya Rêzdar Ocalanî rayîrê heme şaran akeno. Eke wazenê nê prosesê ra encamêko baş bigîrê ganê her kesê ke û her dewletê ke tewrê nê prosesê benê sey Rêzdar Ocalanî samîmî bibê. Hêzê kapîtalîstî fikir û paradîgmaya Rêzdar Ocalanî hemverê xo de sey tehluke vînenê û coka ra proseso bîn bênetîce mend. Rêzdar Ocalanî prosesê bîn yê çareserîye de zî eyn çî vatêne. Vatêne ‘ez eşkena no mesele şerî ra ravîrna aştî.’ Ma wazenê ke nê problemê bi hewayêko demokratîk bêrê çareserkerdene. Sey raya verêne ma reyna eynî nuqta de yê û wazenê prosesêko serkewte bibo.”
‘Seba çareserîya Meseleyê Kurd muxatab Îmrali yo’
Narîn Gezgor bale ant çaresekerdişê Meseleyê Kurd û wina vat: “Ma nêeşkenê vajê ke bi pêvînayîşêk tecrîd hewanîyayo. Ganî azadîya Rêzdar Ocalanî bîyarê ca. Mîlyonan, sere de cinîyan vato ke seba çareserîya Meseleyê Kurd îradeyê mi û muxatab Rêzdar Ocalan o. Îqtîdarê Tirkîya ganî nê tecrîdî hewano û azadîya ey biyaro ca. Bi nê şeklî eşkenê muzakere bikerê û Meseleyê Kurd çareser bikerê.”
‘Yewbîyayîşê ma xelasîya ma yo’
Narîn Gezgor tewr peyên bale ant yewbîyayîşê Kurdan ser o û wina qedîna: “Ganî ma bibê yew. Xelasîya ma girêdayeyê yewbîyayîşê ma ya. Eke ma bibê yew ma eşkenê heme probleman çareser bikerê. Eke ma bibê yew ma eşkenê hem destê Rêzdar Ocalanî hem zî destê embazanê xo xurt bikerê. Verba nê hêrişan ke deskewteyê Kurdan yenê hedef girewtene ma ganî yew bibê û xover bidê.”
