Serekê Herêma Federe ya Kurdîstanî Nêçîrvan Barzanî eşkerayîya xo ya peymana mabênê hukmatê demkî ê Sûrîye û HSD’yî ser o vat ke ê paştî danê peymane û hêvî kenê ke heqê kurdan bibê bingeh.
Serekê Herêma Federe ya Kurdîstanî Nêçîrvan Barzaî derheqê peymana mabênê Hêzanê Sûrîyeya Demokratîk (HSD) û hukmatê demkî yê Sûrîye de hesabê xo yê X’î ser o eşkerayîyêk pare kerd.
Barzanîyî dîyar kerd ke ê pêşwazî û piştgirîya pêameyîşê mabênê hukmatê Sûrîye û HSD’yî kenê vernîya vindarayîşê şer, yewkerdişê sazgehanê leşkerî û îdareyî, teqezkerdişê heqanê medenî û perwerdeyî yê şarê kurdî û agêrayîşê koçberan seba ca û waranê înan akera.
‘Gamêka muhîme ya’
Nêçîrvan Barzanî parekerdişê xo de wina vat: “No pêameyîş gamêka muhîm û durist a seba çareserîya aştîyane û qedînayîşê kaosî. Ma her tim teqez kerdo ke dîyalog, fehmkerdişê yewbînan û rayîrê sîyasî, tena berê sereke yê seba vînayîşê çareserîyêka domdare ke menfeatanê her di hetan xo de hewînena.”
‘Aramî seba pêroyê Sûrîye’
Barzanîyî seba peymane hêvîyê xo îfade kerdê û wina vat: “No pêameyîş seba aramî, aştîya komelkî û pîyaciwîyayîşê aştîyane yê mabênê cîyayîyan de zemînêko weş o. Ma hêvîdar ê ke bibo cayê awankerdişê Sûrîyeyêka yew, destûrê bingeyîn de pawitişê heqanê şarê kurdî û heme netewanê cîya û caardişê aramîye seba Sûrîye û pêroyê herême.”
