Platformê Yewîya Cinîyanê Kurdan Odaya Tîcaret û Sanayî ya Amedî (DTSO) de bi şîarê “Bi pêşengî û yewîya cinîyanê kurdan ver bi awankerdişê yewbîyayîşê neteweyî” kombîyayîşêk organîze kerd. Kurdîstan, Tirkîya û Ewropa ra xeylê cinî beşdarê kombîyayîşî bîyî û peynîya kombîyayişî de seba raya pêroyî netîcenameyêk ame eşkerakerdene.
Netîceyê kombîyayîşê platformê yewbîyayişê cinîyanê kurdan ê vakurî wina ya:
Cografyaya Rojhelato mîyanênî, zey wextanê verênan, ewro zî mîyanê şer û lejan de yo. Wexto ke ewniyenê tarîxî ra , merdim vîneno ke şar û bawerîya Rojhelatê mîyanênî her roj hêrişanê hegemonan ê neweyînan ra rî bi rî manenê.
Kurdistan bi hezar serran o ke bi destanê kolonyalîstan; bê statu mendo û erd , ziwan û kultur , heqê merdimî û erciyayeyê Kurdan pêroyinî ameyê talan kerdene . Kolonyalîstî û miletê ke ortaxê înan ê pîya qandê xodestvistişê xo, wazenê ke newe ra Cografyaya Rojhelato mîyanênî bivurnê. O semed ra hêrişê şaran û Rojavayê Kurdistanî kenê, bi destê çeteyanê daişî tertele ame kerdene û zaf Kurdî ameyî kiştene. Mexsedê înan o sereke; ortera hewadayîş, awanbîyîşê Cuya azad û demokratîk a, azadîya cinîyan a ke no pancês serrî yo ke ameyo awankerdene. Kurdî vera nê hêrîşan bi quwet û yewbîyayîşê xo yê , vêşêrî zî bi keda cinîyana xoverdayan û zey her wextan serkewte bî. Kurdan bi zaneyena heskerdena netewî û xoverdayişêko xurt dinya rê musna. Ciniyanê xoverdoxan bi kedêka girda bi herketanê xo ya dinya rê bî nimune.
Rojhelatê kurdîstanî de îradeyê azadîyo ke bi qetilkerdena Jina Amînî ya agêrabî xoverdayişê ciniyan û pêşengê vurnayîşê dinya. O xoverdayiş bi şîarê “Cinî, Cuye, Azadî” pêro cayan de vila bî.
Şengal de talûkeyê kiştena bikomî xo musneno û tersêko pîl dano şarî, la şarî xoverdayena xo domnenê. Bi serran o ke Bakurê Kurdîstanî de qedînayiş û înkarkerdişê estbîyayena Ziwan, Nasname û Kulturê Kurdan domnenê. Kurdanê Rojhelatê Kurdîstanî, vera her babet zilm û zordarî xo ver dayo, nika zî bi hêrişê desthilatdaran lejo newe dest pê kerdo, kes nêzano ke o do sebo û do çi biqewimîyo .
Ciniyanê Bakur û Başurê Kurdîstanî waşt ke pêro pîya ewro Amed de kombîyayîşêke hempar virazê. La semedê alozîyê ke virazîyayê, cinîyê Başûrê Kurdistanî nêşayî bêrê. Ma nêwaşt ke kombîyayîşê xo peyde bierzê. Kombiyayişê ma bi tewrbiyayişê delege û meymanan virazîya.
Munaqeşeyê ma yê bi mane diyar kenê ke hêrişê pêro herêman û destkewteyanê Kurdan , zemînêko zaf xurt de awankerdena Yewbîyayîşê Neteweya Kurdan lazimatiyêka cuye û taloq nêbena. Di no çarçewe de pawitena estbiyayena Kurdan encax bi yewbiyayena Kurdana do çareser bibo. O semed ra ma rê têkilîya bi ziwanêko nerm û heskerdiş lazim o.
Sewbîna zî ma bawer kenê ke mesulîyetê Medyaya Kurdan zî nê prosesi de zaf vêşî yê. Seba destkewteyanê Kurdan ked bidê û ê zî bi ziwanê ko têdirbiyayişê Kurdan rê xizmet bikerê.
Nê prosesî de Vakur, Başur, Rojava, Rojhelat heya Kurdistanê Sorî û dîaspora zî ciniyê Kurdan qandê Yewbîyayişê Netewî vengê xo berz kenê, ê do heta yewîtîya Kurdan virazîyo ke bidomnê.
Ma diyar kenê ke heya şarê Kurdî wahîrê statuyêka siyasî û nasnameyî nêbo, aştî û hizur Rojhelatê Mîyanênî rê nîno.
Sey Platforma Yewbîyayîşê Cinîyanê Kurdan ê Vakurî
Ma do bi îradeyê çar parçeyanê Kurdîstanî, Kurdîstana sûr û dîaspora pêro pîya hêrişê ke nasname, ziwan û kulturê ma sero yê têdir şîare “Cinî Cuye Azadî” xover bidê,
Ma pêşniyaz kenê vakur de Platforma Yewîtiya Ciniyanê Kurdan a pêroyine Konferansêko hempar awan bikerê.
Biciwîyo yewbiyayişê Cinîyanê Kurdan, Bicîwiyo yewbiyayişê Kurdan biciwîyo pêgirewtişê Kurdan.
