Hemserekê Pêroyî yê DBP’yî Keskîn Bayindirî Newroza Şirnexî de qisey kerd û vat: “Kurdî seba zeîfîya xo nê seba ke heq kerdo azadî û aştî wazenê.”
Merkezê Şirnexî de bi sloganê “Azadî û Yewîya Demokratîke” Newroze bi coşêko gird dest pêkerd. Des hezaran welatîyî bi cil û berganê xo yê neteweyîyan govende girewte û sloganî vatê.
Nameyê Komîteya Amadekerdişî ser o Hemserekê Qezaya Merkezî ya Şirnexî Selahattîn Barînçî qisey kerd û waşt ke Newroze biba wesîleyê aştîya Rayberê Şarê Kurdî Abdullah Ocalanî. Mesajê Rayberê Şarê Kurdî ke Newroza Amedî rê erşawitbi hetê Hemsereka Qezaya Merkezî ya Şirnexî Esma Erener ra ame wendene.
‘Kurdan aştî û azadîye heq kerd’
Bayindirî vat: “Şirnex de her kuçeyêk de, her zinarêk de lehengêk, Egîdêk est o. Wisarê şarê kurdî û Kurdîstanî ameyo. Ma zaf cehenem dîyî, dejî antê la ma ver bi serkewtişî şinê. Ê yê ke kurdan înkar kenê û vanê kurdî çin ê wa Rahşanan, Botanan ra biewnîyê, wa Amed, Wan, Batman, Stenbol, Hewlêr, Mehabad û Efrînî ra biewnîyê. Eke dinyayêka serfirazbîyaye est a, bi têkoşînê kurdan, bi têkoşînê Ocalanî û bi saya Têgêrayîşê Azadîye do est bo.”
Bayindirî vat: “Azadîya Rayber Ocalanî statuyê şarê kurdî yo, ziwan û heqê şarê kurdî yo. Dinya de mîlyonan kesî wirzîyayî pay û vat ke ê bê Rayberê xo Newrozan pîroz nêkenê. Ma do 2027î de Abdullah Ocalanî reyde, embazanê xo yê girewteyan reyde pîroz bikerê. Kurdî seba zeîfîya xo nê seba ke heq kerdo aştî wazenê.”
‘Şar wazeno Rayberê xo reyde bêro têhet’
Verfeka DEM Partî Ayşegul Dogan bal ante tarîxê têkoşînê Şirnexî ser o û vat: “50 serrî yo kurdî Kurdîstan, Tirkîya û Rojhelatê Mîyanênî de têkoşînêko gird domnenê. Şirnex seba azadîya Rayberê Şarê Kurdî amade yo. Şar wazeno Rayberê xo reyde bêro têhet.”
“Kurdîstan de zilmêko gird ame kerdene”
Hemsereka Pêroyî ya DEM Partî Tulay Hatîmogullari zî qisey kerd û wina vat: “Cenazaya Dayîka Taybete bi rojan teber de mend, ma do ney xo vîr ra bikerê? Zilmo ke nêverda dayîkan bipawê tîya de ame vîynayene. Ez Salih Muslimî ke seba nasnameyê Rojava têkoşîn kerd û seba ke statuyê kurdan bigîro emrê xo vîyarna bi hurmet û minet ana xo vîr.”
Hatîmogullarî wina domna: “Rixmê heme bedelanê giran zî şarê kurdî têkoşînê azadî û demokrasî ra fekveranêda. Şar seba aştîyêka bi rûmetî amade yo. Şar Anqara ra perseno: ‘Ti zî seba aştî amade ya?’ Serra 2026î de Newrozê tewr girseyî ameyê kerdene. Heme waran de welatîyî dora sloganê azadîya Birêz Ocalanî de ame têhet.”
Qiseykerdişan ra pey cinîyan, ciwanan û sîyasetmedaran adirê Newroze wekerd. Koma Sîdar û hunermend Serdar Canan sahne de deyîrê xo vatî û coş da warê Newroze.
