Serekê Komîteya Hazirîya Newroza Stenbolî Veysî Eskî va ke hêvî û hesretê şarî yê aştî reyna zî xurt o û amanc o yo ke Yenîkapî de milyonêk kesî bêrê têhet.
Stenbolî yew merkezanê muhîman ê pîrozkerdişê Newroze ra yo ke emser bi dirişmeyanê “Raybertîya Azad Komelo Demokratîk” û “Seba Azadîye Komelo Demokratîk” yeno organîzekerdiş. Bajar de do Newroze 23ê Adare de Yenîkapî de bêro pîrozkerdiş.
Hazirkerdişê Newroze ke pêşengîya Kongreya Demokratîka Şaran (HDK) de yene kerdene, dewam kenê.Eskî va ke armanc o yo ke emser milyonêk kesî bêrê têhet. Hazirîyan de her qeza de komîsyonî ronîyayî û 150 hezar vilawekê vengdayîşê beşdarîya Newroze vila bîyê. 500 pankartan û 400 bîlboardan de bi Kurdkî û Tirkî îlan vila bîyo. Do teqrîben hezar kesî roldar bibê û va: “Karkerê ma do hetê mêmanan bikerê û emnîyetê herême temin bikê. Tewr tayî 50 avûkatî do kar ser o bibê. Bîlboardê sponsorî û sosyal medya de îlan û reklam do bêrê viraştene. Heta 23ê Adare do zaf qezayanê Stenbol de adirê Newroze bêro veşnayene.”
Eskîyî dîyar kerd ke Newroze hetê heme şaranê Rojhelatê Mîyanênî ra yeno pîrozkerdiş, la seba kurdan wayîrê muhîmîyêka xas o û Newroze tena roşanê şarê kurdî nîya, eynî wext de sembolê xoverdayîş û azadîye yo.Eskî va ke vengdayîşê Rêberê Şarê Kurdî Abdullah Ocalanî bala heme şaran anceno û wina dewam kerd: “Çîyo ke rayîrê nê prosesî akero, başkerdişê şert û mercê ciwîyayîşê Rêzdar Ocalanî û azadîya ey ê. Bi na hişmendîye, waştişê yewin ê meydananê Newroze de do seba awankerdişê azadîya fîzîkî ya Ocalanî bo.”
