Nisêbîn de şar seba piştgirîya xoverdayîş û destkewteyanê Rojava rayra şono.
Platformê Sazgehanê Demokratîk derheqê hêrişanê vera Rojava de qezaya Nisêbîn a Mardînî de rayîrşîyayîş organîze kerd. Parlamenterê DEM Partî, hemşaredar, ciwanê Meclîsê DEM Partî, Dayîkê Aştî, aktîvîstê TJA’yî, endam û rayberê partîyanê sîyasî û sazgehê sîvîl ê komelî zî tede xeylê kesî beşdarê rayîrşîyayîşî bîyê. Sewbîna Şirnex û qezayanê ci ra zî xeylê kesî beşdar bîyê.
Girseyo ke Qada Newroze de kom bi, pankartêk girewt ke ser de “Rojava berxwedan e, azadî ye, wijdan e, nikare teslîm bê girtin. Xwedîderketina li Rojava Xwedîderketina li Mirovahiyê ye” nuştêne. Girseyo ke kom bi sloganê “Bijî berxwedana Rojava”, “Rojava Rojhilat e Kurdistan yek welat e” û “Rojava rûmeta me ye” vatê û şarî deyîran reyde çepikî cenayêne. Girse do Bulwarê Newroze ra heta Parka Aştî rayra şêro û uca de eşkerayî bido.
