Ma û pîyê Rojîn Kabaîş a wendekara Unîversîteya Yuzuncu Yilî ke cenazeyê aye qeraxê Gola Wanî de amebi vînayene, 22ê gulane de dozgerê dewaya kênaya xo reyde pêvînayîşêk kerd. Nîzamettîn Kabaîş da zanayene ke hema zî telefonê Rojîne nêmaeyo akerdene.
Wendekara Beşê Averberdişê Gedeyan a Unîversîteya Yuzuncu Yilî Rojîn Kabaîş (21) 27ê êlula 2024î de Wargeyê Wendekaranê Kênekan ê Seyyîd Fehmî Arvasî ra vejîyaye û 18 rojan ra pey 15ê teşrîna peyêne de qeraxê Gola Wanî ya Dewa Molla Kasimî de cenazeya aye ameye vînayene. Keyeyê Rojîn Kabaîş û emnîyet 15 saetan ra pey ameye agahdarkerdene. Mergê bi guman ê Rojîn Kabaîşî ra 8 aşmî vîyartê. Cipersayîşî de qerarê nimitişî dewam keno û hema zî çîyêk zelal nîyo. Tayê dezgeyê çapemenî hewl da ke mergê Rojîn Kabaîşî sey “întîhar bimojnê la cîhazê şarjkerdişê yê Rojîn Kabaîşî ya vîndîbîyaya, bêvengîya embaza aye ya wargehî ya verî ke vîndî biba aye reyde qisey kerdo, DNA’yî ke leşa ey ser o ameyê vînayene û bêvengîya rayberanê wargehî gumanan zêde kenê.
Pêvînayîş baş vîyarto
Keyeyê Rojîn Kabaîş ke îdiaya xokiştişî qebul nêkeno, seba ke dozgerî reyde pêvînayîş bikerê, 22ê gulane de Amed ra ameyê Wan. Pî Nîzamettîn Kabaîş ke ajansê ma (AW) rê qisey kerd, dîyar kerd ke dozger vengnêdayo înan, ê bi xo ameyî ke derheqê cipersayîşî de agahîyan bigîrê. Nîzamettîn Kabaîş îfade kerd ke pêvînayîşê înan ê dozger reyde qandê 2 saetan dewam kerdo û vat: “Serekê Baroyî û avûkat zî ma reyde ameyê. Pêvînayîş baş vîyarto û biney barê ma sivik bi. Qet nêbo ma zana ke dosya heta kamca ameya. Tewr zêde çîyo ke ma meraq kerdêne, telefonê Rojîne bi. Ma persayî, ma ra vat ke tayê hetan ra abîyo la tayê hetan ra înan nêeşkayo akero. Reyna ma rayedaranê unîversî reyde zî kom bîyê û tersê xo îfade kerdê.”
‘Rixmo ke hende kamerayî est bî Rojîn senî vîndî bîye?’
Nîzamettîn Kabaîş da zanayene ke 8 aşmî hedîse ser o ra vîyartê la hema zî çîyêko zelal çin o. Nîzamettîn Kabaîş îfade kerd ke nimûneyanê DNA’yî ser o bivindertêne do hende wext nêvîyartêne û wina dewam kerd: “Ma vat qey do 3-4 aşman de cipersayîşî ra encamêk vejîyo la no 9 aşmî yo hema zî zelal nêbîyo. Demo ke ma şîyê unîversîte rayedaran ma ara vat ke 270 hebî kamera û nêzdîyê 150 hebî zî personelê ewlekarî est ê unîversîte de. Rixmo ke hende kamera û personelê ewlekarî est ê, na geda senî vîndî bîye? Çira nêvanê? Nika teqez kesekî aye dîya û haya ci tira est a. 32 hezar hebî wendekarî est ê, hende personelî, mamosteyî… Ne embazê Rojîne ne zî yê wargeyî, ne zî personelê wargeyî Rojîne meraq nêkerdo.
‘Ganî cipersayîş bi delîlan bêro roşnîkerdene’
Nîzamettîn Kabaîş dîyar kerd ke o personelanê ewlekarî û rayberîya unîversîte ra gerekar o û qiseykerdişê xo wina qedêna: “Ma wazenê demêko kilm de no cipersayîş zelal bo, bi delîl û tespîtan bêro roşnîkerdene. Se beno wa bi tespît û delîlan bibo ke ma zî pê qayil bibê. Eke bêyî delîl ma rê behsê çîyan bikerê ma rehet nêbenê.”
