Hunerê asinkerîye ke çandêko seserran o, bi averşîyayîşê pîşesazîye reyde hîna vindî beno. Westayê asinî Mahîr Ugurî ard ziwan ke no huner roj bi roj kêmyeno û serê vindîbîyayîşî de yo û va: “Verî no kuçe de vengê çakûçan berz biyêne. La nika wina nîyo.”
Asinkarîye hûnerêko seserran a. Amed de zî nê hunerê asinkarîye bi seyan serran o bi seyan westeyanê destan reyde dewam keno. La bi averşîyayîşê pîşesazîye reyde hîna no çand hêdî hêdî vindî beno. No kulturê asinkarîye ke bi vengê çakûçan dormeyê xo de xo hîs kerdene, hîna destê çend kesan de mendo. Yew înan ra westayê asinkarîye Mahîr Ugur o. Mahîr Ugur qezaya Sûrî de asinkarîye keno. Mahîr Ugurî derheqê hunerê asinkarîye de Ajansê Welatî (AW) rê qisey kerd.
Esnaf Mahîr Ugur eşkera kerd kerd ke wexto ke o 12 serre bi, dest bi karê asinkarîye kerdo û wina va: “Ez tîya de asinî tewnena û sûr kena. Ocaxe de asinî nerm kena. Zaf berhem û hacetanê ke bi asinî virazîyenê, ma şekil danê ci. Hewadayîşê ocaxe û çakûçî zaf zehmet o. Ganî asin ocaxe mîyan de rind bêro kuwayane. Asin ke bi kele hîna o asin nêno bikarardene. Mewsimê hamnanî de zereyê dikanî zaf germ o. Ez lepikan zî kar anena la çîke lepikî zî veşenê, destê mi veşenê. Karê asinkarîye karê tewr verên o.”
‘Nika ê pêro ameyî girewtene’
Mahîr Ugur ard ziwan ke o debara xo bi karê asinkarîye keno û va: “Bi desan serran o ez berê nê dikanî akena û gêrena. Verî dorme de pêro dikanê asinkaran bî. La nika ê pêro ameyî girewtene. Tîya de çend dikanî tenî mendî. Verî zaf kesî wayîrê hunerê asinkarîye bi. La ewro sey verî kes asinkarîye nêkeno. Mîyanê şarî de karê asinkarîye hema hema ke nêmendo. Hîna karê asinkarîye binê xetereyî de yo. Verî makîna çinêbî. Pêro asinî bi destan ameyêne şekil dayene. Her saete tîya de vengê çakûçan berz biyêne. Ewro hîna kes nêwazeno nê karî bikero. Kesê ke no kar kerdene, tewr zengîn înan ra Kawayê Asinkar bi. Bi çakûçê xo şî qiralî kişt.”
