Endama MYKya ÎHD’yî Nuray Çevîrmen da zanayîş ke zîndanê Tirkîya agêrayê merkezê îşkence û binpaykerdişê heqan.
Binpaykerdişê heqan yê zîndanan dewam kenê û selahîyetdaran derheqê babete de tu game nêeşta. Rewşa tepişteyanê nêweşan xeylêk rey ameya rojeve la hema zî binpaykerdişê heqî yenê ciwîyayîş. Endama MYKya ÎHDyî Nuray Çevîrmen derheqê binpaykerdişê heqan ê de ke bi rayîrê mektubê tepişteya Selver Yildirime de ameyê erjnayîş kerd.
‘Problemê kronîkî benê sebebê binpaykerdişî’
Nuray Çevîrmen da zanayîş ke zîndanan de binpaykerdişê heqan yenê ciwîyayîş û vat: “Problemê pîlî yê tepişteyan hetê heqî de est ê. Heqê cuye, heqê weşîye yeno binpaykerdiş. Problemê ke tepişteyî ciwîyenê zaf zehmetin ê. Sewqkerdişê nêweşxaneyan ra bigîre, heta dergkerdişê demê sewqkerdişî, aşman ra dima vetişê revîran, peydakerdişê dermanan û problemê xidayan o. Xeylêk problemî est ê. Problemê ke nînê dermankerdiş, badê demêk kronîk benê û no zî heqê cuye binpay keno.”
‘Tepişteyî wexto ke şinê nêweşxane probleman ciwîyenê’
Nuray Çevîrmen wina dewam kerd: “Heqê weşîye yeno binpaykerdiş. Dermankerdişê bi kelepçe û wesayîtê rîngî sey hacetê îşkenceyî yê. Nê semedî ra tepişteyî nêwazenê şêrê nêweşxaneyan. Tepişteyê nêweşî bi saetan wesayîtê rîngî yê sey qutî de yenê vindarnayîş.”
‘Semedê muracatan cewab nîno dayîş’
Nuray Çevîrmen dîyar kerd xeylê bêhuqûqî benê û vat: “Ma xebere girewte ke doktorî bi sebebê asayîşî kelepçe nêvejenê. Na babete de xebatê derheqê perwerdekerdişê na babete yê Yewîya Tabîbanê Tirkan estbî. La ma netîceyan ra ewnîyenê ke hetê hekîman ra no zêde esas nêameyo girewtiş. Sîstemo ke heqê weşîye werte ra wedarnayo ameyo awankerdiş.”
‘Xeylêk rey bê dermankerdişî agêrenê’
Nuray Çevîrmene bale ant nêweşan ser û vat: “Selver Yildirim tepişteya nêweş a û çimanê aye de problemê cidî est ê. Nêweşxaneyê bajarî de semedê dermankerdişê bi kelepçe red kena û nêwazena bi rîng şêro, agêrena zîndan. Xeylêk problemê bi nê rengî yê tepişteyan est ê. Ganî nê binpaykerdişî verê çiman de bêrê girewtiş. Wezîfe keweno wezaretê weşîye, edalet û karê zereyî ser o. Ganî ma bi vengêko hempar hemverê nê binpaykerdişê heqan têkoşîn bikerê.”
