Rayberê Şarê Kurdî Abdullah Ocalanî “Konferansê Roşnbîyayîşî yê Êzidî” ra mesajêk erşawit û mesaj de va ke “Têkoşînê êzidîyan seba ma hemîyan nîşaneya rayîrî yo. Vengê înan, vengê her kesî yo. Êzidîyan ra wayîrvejyayîş, wayîrvejyayîşê wijdanê merdimeyî yo, Şarê êzidî, resnayoxê heqîqetî yê tewr kehen o.”
Rayberê Şarê Kurdî Abdullah Ocalan Konferansê Roşnbîyayîşî yê Êzidî ra mesajêk erşawit.
Mesaj wina yo:
“Konferansê Roşnbîyayîşê yê Êzidî rê…
Sifte bi nameyê embazanê xo, şima silam kena û xebatanê şima rê zî serkewtiş wazena.
Tarîx, tena demo vîyarte nêdano famdayîş, heqîqet zî dano famdayîş. Şarê êzidî, tewr kehen resnayoxê heqîqetî yo. Mezopotamya de tewr verin wayîrê bawerî bi, her tim cewherîya xo zî pawitê.
Êzidîyî, yew kehenşopî ra hîna zêdeyêr a, çimkî ganî esas gêna. No ser zî pergalanê faşîstan her tim êzidî xo rê telûke dîyê, çike êzidî tarixa verêne ra heta ewro temsîlê cuyeya seyyewbînanî û azadîye kerda.
Êzidîyan her tim vera zilmî têkoşîn da, koyanê Kurdistanî de xo pawit û bawerîya xo rê wayîrvejya. Yeno waştene ke ziwan û bawerîya înan bêro qedexekerdene la ê kulturê xo cuyayî. Pêşengîya têkoşînê êzidîyan her tim cinîyan kerde û qet vera hêrişan vilê xo çewt nêkerd. Şengal de bi xoverdayîşê xo, şaranê bînan ra zî bîyê hêvîyêk.
Têkoşînê êzidîyan seba ma, hemîyan ra nîşaneya rayîrî yo. Vengê înan, vengê her kesî yo. Êzidîyan ra wayîrvejyayîş, wayîrvejyayîşê wijdanê merdimeyî yo.
Heqê êzidîyan est o ke pergalê xo awan bikerî. La pergalê seyyewbînanî yê êzidîyan ne hetê dewletanê zextker ne zî hetê nijadperestan yeno şinasnayene. No encax bi pergalê xorayîrberdişî mumkin o, çimkî no pergal de seyyewbînanî û birayîya şaran est o.
Wa her kes na raştî bizano ke şarê êzidî tena nîyo. Vera 73 fermanî xover dayî û nê rojan resayî. Êdî do bi prosesê Aştî û Komelê Demokratîkî çew înan nêeşkero qir bikero. Êdî demê fermanan qedîya, estbîyayîşê êzidîyan seba ma, hemeyê şaran meseleya rûmetî ya.
Abdullah Ocalan
15.07.2025
Girawa Îmraliyî”
