Rayberê Şarê Kurdî Abdullah Ocalan konferansê “Seserrîya Serewedaritişê Şêx Seîd, Hereketê Azadîye, Şêx Seîd û Embazanê ey, Vîr û Îtîrazo Kolektîf” rê mesaj erşawit û vat: “Xeta Şêx Seîdî demo ke paradîgmaya neteweya demokratîke reyde bîye yew, do biresa amancê xo yo rasteqîn.”
Kongreya Neteweyî ya Kurdîstanî (KNK) û Komelo Îslamî yê Kurdîstanî (CÎK) û Enstîtuya Kurdî ya Belçîka “Seserrîya Serewedaritişê Şêx Seîd, Hereketê Azadîye, Şêx Seîd û embazanê ey, vîr û îtîrazo kolektîf” organîze kenê. Konferans Centre Culturel Espace Maghî de yeno kerdene. Gelekî kes û sîyasetmedarî beşdarê konferansî bîyê.
Konferans sirûdê “Ey Reqîb” û rêzgirewtişî reyde dest pêkerd. Qiseykerdişê destpêkî Hemserekê KNK’yî Ahmet Karamusî kerd.
Pêşkêşkara Konferansî Gulîstan Çîya Îke zî mesajê Rayberê Şarê Kurdî Abdullah Ocalanî erşawitbi, wend.
Mesajê Abdullah Ocalanî wina yo:
“Seba Konferansî Seserrîya Serewedaritişê 1925î
Cemîyetê Azadî, Şêx Seîd û Embazê ey, Vîr û Îtîrazo Hempar
Rastîya tarîxî ya ke ma şexsê Şêx Seîdî de behsê ci kenê, serewedaritiş yan zî serewedaritoxîyêka herême ra dûrêr o. Na rastî têkoşînêko tradîsyonî yê seba estbîyayîşî yo ke vîro kolektîf ê şarê kurdî de herindê xorînî verdayê. O têkoşîn serewedaritişê komelo kurdî yo ke bi bawerî, tradîsyon û îradeyê vera zîhnîyeto yewperest ê ferzkerde vejîyayo orte.
Şêx Seîd sey pêşengêko şert û mercanê serdemê xo de, berpirsîyarîya komelkî girewta xo ser o û vera polîtîkayanê înkarî yê ke îradeyê kurdîtîye hedef girewtêne, helwêstêko xurt nîşan dayo. No serewedariştişo ke şexsê ey de manayêk gêno, tena reaksîyonêko sîyasî nîyo, eynê wextî de reaksîyonêko komelkî yo. No reaksîyon îfadeyêko tarîxî yê sozdarîya kurdan a bi heqîqetê xo yo.
Sîyaseto merkezîperest û yew-nasnameyî yê ke serranê destpêkî yê Komare de ame rayraberdene, amanc kerdêne ke şarê kurdî estbîyayîşê înan ra dûrî bifîno. Şêx Seîdî vat, ‘Ma edalet waştêne la şiam cezaya dardekerdişî daye’ û bi na qale vera nê sîyasetî vengê şarî berd heta sêpê dardekerdişî. Na qale nîşaneyo tewr zelal û bihêz o ke nîşanê ma dano ke heqîqet hemverê zilmî de gamêk apey nêeşta. Reyna qalê ey ê sey ‘Birêz dozger, kam şîyêne pîya kavire werdêne’ îfadeyê komployî yo ke o rî bi rî mendo. Qalê ey ê sey ‘Bêguman tornê mi do qesasê mi bigîrê’ hêvîya xoverdayîşî yê ke ey azanê ameyoxî rê verdayê, înan ra yew a.
Nuqtayêka bîne est a ke ganî tîya de binê aye bêro xêzkerdene: Sey xoverdayîşêko tarîxî, serewedaritişo ke serekîya Şêx Seîdî ame kerdene zî, şert û mercanê serdemê xo zereyê xo de hewîneno. Têkoşînê ewroyînî reyde girêdayîşê ê serewedaritişî, bi romantîzekerdişî nê la bi vetişê dersanê binyatîyan û newe ra awankerdişê berdewamîya tarîxî, xetêka azadîwaz û demokratîk mumkin o.
Mi nê tradîsyonî seba bedilnayîşo şorişgêrî yê kurdbîyayîşêko azad sey bingeh girewto dest. Têkoşîno ke ez rayra bena, amanc keno ke mîrasê xoverdayîşî yo manadar ê demê vîyarteyî bi sîstemo demokratîk, zafhetî û aştîya komelkî ya ameyoxî reyde bîyaro têhet. Xeta Şêx Seîdî demo ke bi paradîgmaya neteweya demokratîke ya ewroyîne reyde bêra pêrabestene, do manaya xo ya rastîne bidest fîno.
Kurbîyayîşêko azad bi sozdarîya tarîx, kultur û erjanê ehlaqî-sîyasî yê şarî reyde mumkin o. Ganî şarê ma na babete de haydar bo û mîraso pîroz ke rayberanê tarîxî xo ra pey verdaya, bipawê.
Bi nê bingeyî, ez Şêx Seîd û embazanê ey bi rêzdarî ana xo vîr û reyna qerardarîya xo ya seba wayîrverjîyayîşê erjanê têkoşînî yê rayîrê azadî û rastîye ser o dîyar kena. Bi hêvîya konferansêko serkewte heme beşdaran silam kena.”
Abdullah Ocalan
Îmrali, Hezîrana 2025î
