Behdînan de yew cinîye reyde mêrdeyê xo odeyêka keyeyê xo seba berhemanê kulturî û kurdewarî çarnaya muzexaneyêk ke nê berheman bipawo. Dayîka Hemdîye hetanê eleqedaran ra waşt ke seba pawitişê nê berheman hetkar bibê.
Kultur û berhemê ey nasnameyê komelan dîyar kenê. Pawitişê înan erkê heme ferdanê komelî yo. Bi taybetî seba pawitişê berhemanê komelkîyan û raverberdişê ey tîm cinîyan rolê serkêşî kay kerdo. Bi taybetî raverberdişê kultur û nasnameyî de.
Nê cinîyan ra yewe zî dayîka bi nameyê Hemdîye Tahir a û dewa Dêregijinî ya ke girêdayeyê herêma Behdînanî ya de ciwîyena. Dayîka Hemdîye mintiqa de sey Dayîka Heyrane yena şinasnayîş.
‘Koçka Bavî Heyranî’
Dayîka Hemdîye serran o ke reyde mêrdeyê xo odeyêka keyeyê xo seba pawitişê berhemanê kulturî û kurdewarî çarnaya yew muzexane. Dayîke Hemdîye nameyêk zî na ode ser o kerdo û ci ra vana; ‘Koçka Bavî Heyranî’.
Dayîka Hemdîye reyde mêrdeyê xo serra 2018î ra nat dest bi arêdayîş û pawitişê nê berhemanê kulturî û kurdewarî kerdo. Goreyê Dayîke Hemdîye kultur û ananeyî nasnameyê kurdî yê û bi demî ra yenê vîrakerdiş û vinî benê; coka biryar girewto ke înan hetanî peynî bipawê.
Na muzexaneya qice ke hendê yew cîhanî zengîn a de berhemê sey cerre, dîzike, rîsê cîya cîyayî, toxînî, posteyê vergan, dasî, çekê kehanî û xeylê berhemê bînî estê. Her wina xeylê berhemê kehanî ke dadî û kalikan ra mendê û eşyayê zereyê keyeyî zî tede estê.
Xeylê çîyê est ê
Dayîka Hemdîye Tahir derheqê karê xo û na keda xo ya pîroze de Rojnewsî rî qisey kerd.
Dayîka Hemdîye ard ziwan ke her çiqas muzexaneya aye qice zî, bala dormeyî û bi taybetî zî geştyaran ant a xo ser û vat: “Xeylê welatiyê zereyî û dormeyî yenê serdanê keyeyê mi û sipasê mi kenê. Çi heyf seba qicbîyayîşê ode nêeşkena her çî bimocna. Eke cayê ma bibîyêne mi eşkayêne xeylê çîyê bînî zî bimojna.”
Berhemanê kehanan
Dayîka Hemdîye derheqê astengîyanê verê xo de zî wina va: “Pawitiş û wayîrvejîyayîşê nê berheman her ke şino giranêr beno. Ganî tîm cayê înan bêrê newekerdiş ke seba kesê ke yenê serdayîş, bala înan hîna weş bianco xo ser. Reyde na rewşe zî heskerdişê înan o seba berhemanê kehanan kerdo ke tîm bêrê zîyaretkerdiş.”
Tewr peynî Dayîke Hemdîye hukumet û hetanê eleqedaran ra waşt ke cayêko gird û baş seba aye peyda bikerê ke no ca bibo cayêko nimûne her hetê Herêma Kurdîstanî de, teyna Behdînan de sînordar nêmano.
Dayîka Hemdîye ard ziwan ke waştişê aye o yo ke xeylê cayê bînî zî sey ‘Koçka Bavî Heyranî’ bibê.
