Şube û temsîlkarê Komela Huqûqnasanê Seba Azadîye (OHD) Amed, Wan, Dîlok, Riha, Mardîn, Êlîh, Şirnex Colemêrg û Stenbol, Anqara, Bûrsa, Îzmîr, Mêrsîn û eynê wextî de şaristanê; Semsûr, Mûş, Edene, Antalya çarçewaya 21ê Sibate de seba ziwanê Kurdkî bibo ziwano fermî û perwerdeyî bi hewayêko hemwext eşkerayî daye çapemenî.
Bi munasebetê 21ê Sibate Roja Ziwanê Dayîke ya Dinya xeylê şarsitanan de xebatê seba ke Kurdkî bibo ziwanê perwerdeyî eşkerayîyan danê. OHD seba ke Kurdkî bibo ziwanê perwerdeyî xeylê şube û temsîlkaran de eşkerayîyê hemparî dayê û vengdayîşê caardişê heqê ziwan ê komelkî keno.
AMED
Şuebya OHD’yî ya Amedî vernîya awanîya Edlîyeya Amedî de eşkerayî daye. Endam û rayberê partîyanê sîyasî, temsîlkarê sazgehanê sîvîl û xeylê avûkatî beşdarê eşkerayî bîyê. Eşkerayî de pankartê, “Ganî ziwanê Kurdkî bibo ziwanê fermî û perwerdeyî” ame akerdene. Metnê eşkerayî hetê avûkat Mehmet Emîn Gokdemîrî ra ame wendene.
Pêro ziwanî erjê bingeyinî yê merdimîye yê û wayîrê eynî heqan ê
Mehmet Emîn Gokdemîrî dîyar kerd ke ziwanê kurdkî erjêko tewr bingeyinî yê kurdan û merdimîye yo û yew semedê estbîyayîşê yê kurdan o û wina vat: “Bi hewa, rayîr û metodanê cîya-cîyayan, çinhesibnayîş, qedexekerdiş, asîmîlekerdiş, vernîgirewtiş, sînordarkerdiş û hewldayîşê seba helênayîşî û orterawedaritişê ziwanê kurdkî, sucêko tewr girdî yê vera merdimîye yo. Na heqîqete ra; ganî ziwanê kurdkî, hetê pêro sazî û dezgeyanê pêro dewlet û mîyandewletan ra, bi taybetî hetê Dewleta Tirkîya ra bi hewayêko resmî bêro şinasnayene û şuxulnayîşê ey pêro qadanê komelkî û cuye de, her hetî ra azad û serbest bo.
Kurdkî, tena hacetê komunîkasyonê cuya rojane ney, hemwextî de hîs û dinyaya şarî, berardişê fikran û kiriştişê vîrê komelkî yê şarî rê erjêk a. Warê umûmî de şinasnayîş û pawitişê ziwanî; zafhûmarîya kulturan, sîstemê demokratîkî yê komelkî û heqê merdiman rê zaruretêk o.”
‘Ziwanê Kurdkî zî ganî wayîrê heq û statu bibo’
Mehmet Emîn Gokdemîrî dewamê qiseykerdişê xo wina domana: “Seke yeno zanayene 1999î de hetê Yewîna Netewan (YN) Rêxistinê Perwerdeyî, Zanistî û Kulturî (UNESCO) ra roja 21ê Sibate semedê zafkulturîye û zafziwanîye, sey Roja Ziwanê Dayîke ya Mîyannetewî ameya qebulkerdene. Nê semedî ra goreyê prensîbê ‘’ganî pêro ziwanê yê dinya seyyewbînî wayîrê heqan bibê’’ ganî Kurdkî zî nê heqî ra îstîfade bikero.”
Mehmet Emîn Gokdemîrî vat ke prosesê çareserî ke Tirkîya de aver şono sey OHD waştişê înan est ê û wina domna: “Nê bingeyî de; bi destpêkkerdişê Komeleyê Huqûqnasê Semedê Azadî û paştîdayîşê pêro huqûqnasan ra; 15ê tebaxa 2025î de kampanyayêk ame viraştene ke prosesî aştî yo ke nika tirkîya de dewam keno, ganî nê waştişî hetê huqûqî ra bêrê ca û bipawîyê, nê şertan rê 2.000î ra zêdêrî huqûqnasî îmzayî eşt ê û nê çîyan ardî ziwan. Goreyê nê şumûlî;
1- Ziwanê kurdkî bi hewayêko resmî bêro şinasnayene û bibo wayîrê statuyî.
2- Ziwanê kurdkî verdibistanan ra heta unîversîteyan bibo ziwanê perwerdeyî.
3- Vernîgirewtişê xebetnayîşê ziwanê kurdkî ser o pêro astangîyê fîîlî û huqûqîyî ganî wedarîyê, semedê azad û serbestbîyayîşê ziwanê kurdkî, ganî teqez bilezûbezî gamê qanûnî û qanûnêbingeyînîye hetê TBMMî ra bêrê eştene.
Ma nê huqûqnasê ke nê metnî de îmzayê ma est ê, ma veng danê ke; nê waştişanê ma bêrê verê çiman, semedo ke kurdkî bibo wayîrê statuyê fermî û bibo ziwanê perwerdeyî ganî Meclîs bêvindertiş û apeyvistişî, wa xebatanê qanûnî rê gamî bêrê eştene.”
Eşkerayî bi çepşkan qedîyaye.
