Komîsyonê Cinîyan ê OHD’yî yê Amedî derheqê heqaret û nenganê vera sîyasetmedara kurd Leyla Zana şermezar kerdê û Komîsyonî vat ke nê heqeret û hêrişî bi hewayêko organîzekerde ameyê kerdene û waşt ke TFF û rayedarê hukmî dest bi cipersayîşêko tesîrdar bikerê.
Komîsyonê Cinîyan ê Komela Huqûqnasanê Seba Azadîye (OHD) ê Şubeyê Amedî seba heqaret û nengê vera sîyasetmedara kurd Leyla Zana ke maçê Bursaspor û Somasporî de ameyê kerdene, vernîya Dadgeha Amedî de eşkerayî daye û nê vatîşê nefretî şermezar kerdê. Rayberê partîyanê sîyasî, Dayîkê Aştî, sazgehê cinîyan û rêxistinê sîvîlî piştgirî daye eşkerayî. Eşkerayî de pankartê, “Leyla Zana rûmetê ma ya” ame akerdene û sloganê, “Leyla Zana rûmetê ma ya” ame vatene.
Hemsereka Pêroyî ya OHD’yî Ekîn Yeter çi heyf ke eşkerayî tena bi tirkî wende.
‘Bursaspor nasnameya kurdan ser o nefretî vila keno’
Ekîn Yeter dîyar kerd ke heqeretê vera Leyla Zana ameyê kerdene, nêyenê qebulkerdene û vat: “Ma nê heqeretan sey hêrişêko organîzekerde yo ke sîstemo serdest ê camêrdî û kodanê nîjadperestî vînenê. Hêriş û heqaretê nîjadperestî terefgiranê Bursasporî reyde dest pêkerd, xeylê maçanê bînan de zî dewam kerd. No mojneno ke no pratîk polîtîkayanê lînçkerdiş ê sîstematîkî ra beşêk o, bi zanayîş û plankerde yê. Grûba terefgiranê Bursasporî demêko derg o ke hereketanê xo yê nefretî vera kurdan domneno.”
Vengda TFF û hukmî
Ekîn Yeter da zanayene ke ê do na mesela ra fek veranêdê û vengda TFF û rayedaranê darazî ke vera nê heqaret û hêrişan dest bi cipersayîşêko tesîrdar bikerê.
Endama OHD’yî Gulbahar Ateş zî derheqê babete de bi kurmancî ajansê ma rê qisey kerd.
‘No heqaret bera heme şarê kurdî bi’
Eşkerayî ra pey Endama OHD’yî avûkat Gulbahar Ateş derheqê hedîse de qisey kerd û wina vat: “Nê heqaret û neheqî medyaya dîjîtale ser o xeylê vila bîyê. 16ê kanûne de mabênê Bursaspor û Somasporî de maçêk ame kaykerdene. Nê maçî de terefgiranê taximan bi hewayêko nîjadperest, cinsîyetperest, şexsîyetê Leyla Zana ser o heqaret kerd. La ma baş zanê ke nê heqaretî vera îradeyê şarê kurd û cinîyan bîyê. Heqareto ke ameyo kerdene, şexsê Leyla Zana de heme şarê kurdî rê ameyo kerdene. Ma zanê ke do seba nê heqaretan faîlî nêrê cezakerdene. Cezanêkerdiş rayîrê vernîya heqaretanê bînan akeno. Ma zî sey Komîsyonê Cinîyan ê Huqûqnasanê Seba Azadîye taqîbkerdoxê nê prosesî yê.”
