Oldarê Kantonê Reqayî vat Dewleta Tirke hêrişê verba herême wazena welatijan koçber biko. Eynî demî de verba hêrişan qatî yewbînangirewtiş şert o.
Dewleta Tirke hêrişê xo yê verba şaristan û şaristanokê herêma Sûrîyeya Bakûr û Rojhilatî domnena. Nê hêrişan de bi îdiaya pawitişê ewleyîya xo û sînorê xo, sivîlan û binsazîya herême kena hedef.
Hêzê Surîyeya Demokratîke (HSD) pêroyî cepheyê Kantonê Fîrat û Cîzîrî yê herêma Sûrîyeya Bakûr û Rojhîlatî hêrîşê dagirkeran şikitî û zirarê girde dayê înan.
Oldarê Kantonê Reqayî seba çinkerdişê hêrişan qatî bi yewbînangirewtişê pêkhateyan kerd.
Serekê Komîteya Fetwayan a Sazîya Kar û Barê Olî ya Kantonê Reqayî Şêx Mihemed Yehya Ebû El Berat vat: “Ma wazenê şarê Sûrîye mîyanê ewleyî de biciwî. Ma bira yê û yewbînan ra hes kenê.”
Ebu El Bera wina domna: “Wa rijnayişê gonî bivindero. Merdim û heta kerra rijnayişê gonî domanan, cinîyan û îxtîyaran acîz ê.”
Serekê Sazîya Kar û Barê Olî ya Kantonê Reqayî Şêx Îbrahîm El Lwês zî vat: “Ma nê rojan de veng welatijan kenê ke no rîpelo newe, wa bibo rîpelê hezkerdişî, efûkerdiş û pêameyişî. Rîpelê yewîye ya pêkhateyan o. Wa ma bi aqilê xo kar bikê. Wa mabênê sûrîyeyijan de dîyalogêka adil bibo. Dewleta Tirke wazena Sûrîye parçe bika û herra Sûrîye dagir bika.”
