Sîyasetmedar Hîşyar Ozsoyî ard ziwan ke PKK’yî bi qerarê xo yê peyênî pêvînayîşanê haştîye de destê Abdullah Ocalanî xurt kerd û vat, “PKK wayîrê Rayberîya xo vejîyeno û bi fedakarîye masaya muzakereyî de destê ci xurt keno.”
Wekîlo verên ê HDP’yî Hîşyar Ozsoyî ke dewro newe yo ke PKK’yî bi vengdayîşê Rayberê Şarê Kurdî Abdullah Ocalanî da destpêkerdene, ANFyî rê erjna, vat no qerar destpêkerdişêko newe yo û na çarçewe de têkoşîno sîyasî yê kurdan do bibo xurtêr.
Ozsoyî bi yadkerdişê Endamê Heyetê Îmraliyî Sirri Sureyya Onderî dest pê qiseykerdişî kerd û nê vatî: “Sirri Sureyya Onder kesêko zafhetin bi la tewr zaf sey aktîvîstê haştîye û sembolê têkoşînê haştîye vîran de ca girewt. Xeylê serrî sey hemrayê Birêz Ocalanî semedê averşîyayîşê prosesê çareserîye keda pîle daye. Prosesê 2012-2013yî ra nata prosesê çareserîye çend raştê astengan bêro zî badê des serranê peyênan ê şerê bişîdetî îradeyêko newe vejîya werte.
Sey hêvî tehluke û rîskî zî est ê
Hetê kî ra rewşa Rayberê Şarê Kurdî Birêz Ocalanî ke bi serran o şertanê tecrîdî ciwîyeno û hetê bînî ra polîtîkayê zextî yê xeta Bahçeli-Erdoganî est ê. Çîyê ke ewro qewimîyenê hetêkî ra hêvî danê. Çunke newe ra îxtîmalê haştîye yeno afirnayene la hetê bînî ra tersêk est o. Yanî senî ke îmkanêk û hêvî est ê hendê zî tehluke û rîskê girdî zî est ê.”
Peynî nê destpêkerdişêk o
Hîşyar Ozsoyî wina dewam kerd: “PKK wayîrê Rayberîya xo vejîyeno û bi fedakarîye masaya muzakereyî de destê ci xurt keno. Xora kulturê fedakarîye yê PKK’yî est o. Eke çew na çarçewe de biewnîyo ci ra belka na çalakîya fedayîye ya peyên a. Rêxistina çekdare ya 50 serran ameya yew nuqta ke estbîyayîşê xo qedînena. La no peynîyêk nîyo; eslê xo destpêkerdişêk o. Tekoşîno sîyasî yê kurdan, waştişê haştîye û azadîye yê Tirkîya û Kurdîstanî do bi metodanê neweyan bi hewayêkê qerardarî bêro domnayene. Ma hêvî kenê ke hinî ciwanê memirê û dadî û babîyî mebermê.”
