Zaf wekîlanê Meclîsê Netewî yê Fransa deklarasyonêko muşterek weşana û piştî daye xoserdarîya demokratîke ya Rojawanî û têkoşînê şarê kurdî. Ame îfadekerdene ke azadîya fîzîkî ya Rayber Apoyî seba prosesê haştîye şerto bingeyin o.
Grûbêka wekilanê meclîsî Meclîsê Netewî yê Fransa ra bale ante hêrîşê ke modelê Rojawanî yê Vakur û Rojhelatê Sûrîye ser o yenê kerdene û venga komelê mîyannetewî da hareket bikerê. Parlamenteran îfade kerd ke sîstemê konfedaralîya demokratîke herême de cuyêka seypêye û azade eşkena mumkun bikera û îfade kerd ke Tirkîye çarçewaya huqûqê mîyannetewî de ganî Rayber Apoyî rê “heqê hêvîye” nas bikera.
Deklarasyonî de wina ame vatene: “Ma sey wekîlanê Meclîsê Netewî yê Fransa seba şaranê ke vakur û rojhelatê Sûrîye de, herêma Rojawanî de ciwîyenê, piştîdayîşê xo yê pêroyî û bêşert îfade kenê. No strukturo ke cinîyî rolo merkezî gênê xo ser û goreyê prensîbê konfedaralîzmê demokratîkî yeno îdarekerdene, modelêkê îdareyî yê ke komelê etnîkî, dînî û kulturî yê cîyayî – kurdî, erebî, Sûryanî, Êzîdî, Xirîstiyanî… – pîya bieşkê biciwîyê, awan bikero. Labelê 2012î ra nat no modelo komunalîst vera hêrîş û tehdîdan mendo. Cayêk ra rejîmo newe yê Sûrîye yo ke Ehmed El Şara serekîye keno, bi taybetî polîtîkayê tedaya cinîyan ser o destê xo derg keno. Cayêko bîn ra zî Tirkîya heta tarîxêko zaf nêzdî herêmanê Xoserîya Vakur û Rojhelatê Sûrîye bombardûman kerdêne. Goreyê vengdayîşê ke Abdullah Ocalanî Girawa Îmralîyî ra kerd û îradeyê PKK’yî yê veşnayîşê çekan, heta ewro zî seba çareserîyêka demokratîke ya şênbere ke tecrubayê demokratîkî yê Rojawanî bêrê garantîkerdene, averşîyayîşêk nêameyo kerdene.
Seba ke prosesê haştîye bi raştîye bieşko aver şêro, Tirkîya ganî normanê huqûqê mîyannetewî bica bîyara û ‘heqê hêvîye’ yê Abdullah Ocalanî nas bikera.
Fransa, Ewropa û dinya; bi taybetî seba rolê dîyarkerdeyî yê binvistişê DAÎŞ’î , ma şarê kurdî, bi taybetî zî cinîyanê kurdan rê deyndar ê. YPG/YPJ û Hêzê Sûrîyeya Demokratîke bi bedelo girs bi hezaran sîvîlî xelisnayî, herême DAÎŞ’î ra pakkerd û berpirsîyarîya îdareyê nê erdan girewt.
ÎMZADAYOXÎ:
* Mathilde Panot, La France Insoumise: LFI (Serekê Grûbe
* Emmanuel Fernandes: LFI
* Nadège Abomangoli, Hetkarê Serekê Meclîsî
* Clémence Guettê, Hetkarê Serekê Meclîsî
* Thomas Portes, Serekê Grûba Xebate ya Kurdan
* Anaïs Belouassa-Cherify: LFI
* Christophe Bex: LFI
* Carlos Martens Bilongo: LFI
* Pierre-Yves Cadalent: LFI
* Gabrielle Cathala: LFI
* Hadrien Clouet: LFI
* Jean-François Coulomme: LFI
* Sylvie Ferrer: LFI
* Arnaud Le Gall: LFI
* Muriel Lepvraud: LFI
* René Pilato: LFI
* Aurélien Tache: LFI
* Paul Molac: LIOT
* Danielle Simonnet: EcoS
* Elsa Faucillon: GDR
