Cagirê Serekê Pêroyî yê Partîya Gelecekî Alaattîn Firatî îfade kerd ke partîya înan wazena heqê perwerdeyê ziwanê Kurdkî yo fermî û heqê hêvî yê Abdullah Ocalanî bişinasnê û vat: “No heqêkê merdiman o. Eke proses aver şîro mumkin o ke Abdullah Ocalan tewrê sîyasetî bibo.”
Prosesê Aştî û Komelê Demokratîkî ke vakurê Kurdîstan û Tirkîya de dest pêkerdo, vîyart merheleya dîyine. Merheleya dîyine de seba ke proses vîyaro aştîyêka pozîtîfe do qanûnî bêrê vetene. Partîyê sîyasî yê Komîsyonê Demokrasî, Waûbirayî û Piştîdayîşê Mîllî, Grûba Yenî Yol, EMEP, TÎP û DSP’yî raporê xo ke amade kerdbî, pêşkêşê meclîsî kerdê. AKP û CHP’yî zî dîyar kerd ke raporê înan amade yê û demanê vernîya ma de do pêşkêşê meclîsî bikerê. Dima ke heme partîyan raporê xo teslîmê komîsyonî kerdê, komîsyon do heme raporan bianco pêser û goreyê waştişanê partîyan raporêk amade bikero û pêşkêşê Komîsyonê Edaletî yê Meclîsî bikero. Komîsyonê Edaletî yê Meclîsî zî do raporî bierjno û bierşawo Komîsyonê Pêroyî yê Meclîsî. Komîsyonê Pêroyî yê Meclîsî zî do seba ê qanûnan vengdayîşî bikero. Eke rayî zaf bivejîyê do qanûnî bêrê qebulkerdene.
Rayberê Şarê Kurdî Abdullah Ocalan 6ê kanûne de Konferansê Aştî û Komelê Demokratîk ê Mîyanneteweyî rê mesaj erşawit û waşt ke Prosesê Aştî û Komelê Demokratîk prensîbanê, “Qanûnê hemwelatîya azade, Qanûnê Aştî û Komelê Demokratîkî û Qanûnanê azadîye” ser o bêro averberdene. DEM Partî zî raporê xo de ca da nê qanûnan û raporê xo goreyê naskerdişê heq û estbîyayîşê Neteweyê Kurd û heme neteweyê ke Tirkîya de ciwîyenê, amade kerd. Heme partîyê sîyasî zî do helwêstê xo yê prosesî raporanê ke amade kerdê, înan de dîyar bikerê. Cagirê Serekê Partîya Gelecekî Alaattîn Firat ke derheqê prosesî de ajansê ma rê qisey kerd, helwêstê partîya xo yê vera prosesî û qanûnanê ke ganî vejîyê, dîyar kerd.
‘Ganî heqê perwerdeyê ziwanê Kurdkî bêro şinasnayene’
Alaattîn Firatî dîyar kerd ke sey Partîya Gelecekî ê wazenê ke heqê perwerdeyê fermî yê ziwanê Kurdkî bêro ca û nê çîyî vatî: “Heme partîyê Tirkîya goreyê programê partîya xo raporêk amade kerdo û do pêşkêşê komîsyonî bikerê. Seba averşîyayîşê prosesî ganî qanûnan de serbestî û demokratîkbîyayîş bêro ca. Ganî heme netewî bi ziwanê xo yê dayîke perwerde bivînê. Şarê kurdî wazeno bi ziwanê xo perwerde bivîno. Tayê partîyê sîyasî raporanê xo de vanê wa fermî nêbo. MHP’yî raporê xo de ca nêdayo heqê perwerdeyê fermî yê ziwanê Kurdkî. Nê raporî heme do bêrê komkerdene û mutabaktêk bêro kerdene. La wina aseno ke eke bi ziwanê Kurdkî heqê perwerdeyî bêro ca, do serbestîyêka hîna hîra bêra ca.”
‘Waştişê Tirkîya û rastîya Sûrîya yewbînan nêgênê’
Alaattîn Firatî bale ant rewşa Sûrîye ser o û vat ke waştişê Tirkîya û rastîya herême yewbînan nêgênê. Alaattîn Firatî îfade kerd ke goreyê rastîya herême netew û bawerî do xo wayîrê heqî bivînê û qiseykerdişê xo wina domna: “Tirkîya babeta Sûrîye de ewleyîya xo fikirîyena. Wina aseno ke şarê kurd do uca de zî bibo wayîrê heqî. Tirkîya wazena kurdî entegreyê sîstemê hukmatê Şamî bibê û nêwazena kurdî uca de bibê wayîrê heqî. Tirkîya wazena Sûrîye de Ahmet Şara bibo îqtîdar û heme Sûrîye destê ereban de biba. Seba ney zî waştişê Tirkîya û rastîya herême yaewbînan nêgênê. Wa vanê ke ganî heme netew û bawerî Sûrîye de bibê wayîrê heqî. Yanî belkî nêbena Federal la wina aseno ke kurd û heme netewê Sûrîye do bibê wayîrê heqî.”
‘Ganî heqê hêvî bêro ca’
Alaattîn Firatî derheqê. Heqê hêvî yê seba Rayberê Şarê Kurdî Abdullah Ocalanî zî îfade kerd ke heqê hêvî heqê merdimîye yo û wina dewam kerd: “Heqê hêvî yê Abdullah Ocalanî zî ma wina texmîn kenê ke proses aver şêro do bêro ca. No heqêko merdiman o. Goreyê qanûnan zî girewteyêk hete peynî hepisxane de nêmaneno û heqê ey o hêvî est o. Ganî a qanûne bêra caardene. Heqê hêvî seba averşîyayîşê prosesî zî do tesîrêko pozîtîk bikero. Yanî beno ke ameyoxî de Abdullah Ocalan vejîyo û sîyaset zî bikero. Yanî demo ke proses encam girewt no mumkin o. Heq û estbîyayîşê kurdan zî do bêro naskerdene. Ganî heqê hêvî bi qanûnan bêro naskerdene.”
