Partîyanê Rojhelatê Kurdîstanî derheqê numayîşanê Îran û Rojhelatê Kurdîstanî, seba beşdarîyêka xurt a grevê pêroyî sipasîya şarî kerd.
7 partîyê sîyasî yê Rojhelatê Kurdîstanî ke belgeyê helwêstê hempar îmza kerdbi, semedê tewrbîyayîşê xurt ê venga înan ê semedê grevî, sipasîya şarî kerd.
Hewt partîyê kurd ê Rojhelatê Kurdîstanî, semedê polîtîkayêka hempar a çalakîyanê numayîşî yê Îranî, 6ê çeleyî de “Merkezê Hemkarî û Vajorî yê Partîyan” awan kerd û belgeyê helwêstê hempar mohr kerd. Merkezî, derheqê numayîşanê Îran û Rojhelatî de eşkerayî daye. Eşkerayî de semedê tewrbîyayîşo girdî yê qerarê grevê pêroyî partîyan, sipasîya şarî ame kerdiş. Eşkerayî de wina ame vatene: “Bi grevan û numayîşanê ke dewam kenê mesajêko xurt o sîyasî hêzê zextker û rejîmê îqtîdarî rê ame dayene.”
Bi domdarî ame vatene ke tewrbîyayîşo girdî yê grevê pêroyî nîşaneyê bawerîya şarî bi partîyanê kurd o û wina dewam kerd: “Îspat kerdî ke têgêrayîşê ‘Jin, Jîyan, Azadî’ dewam keno û kokê xo veradayê mîyanê komelî. Têgêrayîş qerardar o ke çerxê Komara Îslamî reyke û heta peynî orte ra wedarno. Mojna ke polîtîkayê zextî nêeşkenê qerardarîya şarê Kurdîstanî yê bicesaret û azadîwaz qels bikero. Şarê Kurdîstanî û partîyê sîyasî bi yewbîyayîş û piştîdayîşê xo newe ra mojna ke têgêrayîşê înan ê rayîrê azadîye de derbasê qonaxêko newe bîyo.”
