Partîyê sîyasî yê Rojhelatê Kurdîstanî bi eşkerayîyêka hempare piştgirîya xo ya seba serewedaritişê şaranê Îranî mojnaye û vat: “Seba cewabdayîşê rejîmî lazim o şarê Îranî yewîya xo awan bikerê.”
Merkezê Dîyalog û Hemkarîye yê Partîyanê Kurdîstanî yê Rojhelatê Kurdîstanî derheqê kombîyayîşê partîyanê sîyasî yê Rojhelatê Kurdîstanî yê seba piştgirîya şaranê Îranî eşkerayîyêk vila kerde. Eşkerayî de ame dîyarkerdene ke partîyê sîyasî yê Rojhelatê Kurdîstanî piştgirîya xo ya seba xebat û serewedaritişê heme beşanê Îranî mojnenê. Reyna ame vatene ke seba înan do karanê hembeş bikerê.
Hîrayîya eşkerayîya partîyanê Rojhelatê Kurdîstanî wina ya:
“Roja 5ê çeleyê 2026î de partîyê sîyasî yê Rojhelatê Kurdîstanî kombîyayîşêk kerd. Kombîyayîşî de rewşa sîyasî ya Îranî û bedilîyayîşê Kurdîstanî ameyê erjnayene. Kombîyayîşî de piştgirîya xebat û serewedaritişê pêroyî yê şaran û beşanê Îranî ameye kerdene. Qerar ame girewtene ke seba xurtkerdiş û geşkerdişê çalakîyanê vera rejîmê Îranî karê hembeş û berhemdarî bêrê kerdene.
Berpirsîyarîya partîyanê Rojhelatê Kurdîstanî muhîm a
Sekreterê Pêroyî yê Partîya Demokrat a Kurdîstanî û Berpirsê Têkilîyanê Merkezê Dîyalog û Hemkarîya Partîyanê Sîyasî yê Kurdîstanê Îranî, Mistefa Hîcrî qiseykerdişê akerdişî kerd. Hîcrî amancê kombîyayîşê ser o qisey kerd û da zanayene ke wezîfe û berpirsîyarîyê ke rewşa nikayîne de kewenê milê partîyanê Rojhelatê Kurdîstanî ser o giranêr o. Dima ra kombîyayîş fikir û erjnayîşanê beşdaran reyde dewam kerd.
Hêrişê rejîmê Îranî ameyê mehkumkerdene
Kombîyayîşî de pêla nerazîbîyayîş, grev û çalakîyê vera Komara Îslamî ke berhemê bi desan serr ê rişwet, nearamî û sîyasetê vera şaran ame erjnayene. Mudaxaleyê bigonî yê vera çalakîkeran ke Kirmaşan, Îlam, Melekşah û Loristan ke bi qerarê rejîmê Îslamîst ê Îranî yenê kerdene, mehkum kerd. Sewbîna keye û merdimanê şehîdanê çalakîyanê peyên ê pêroyê Îranî rê serweşîye ameye waştene.
Piştgirîya hempare ya bi yew veng ê partîyanê kurd
Eynê wextî de kombîyayîî de qerar ame girewtene ke cehd û rêbazê seba amadekerdişê pêşnimûneyêkê prensîbanê hemkarîya partîyanê sîyasî, dîyarkerdişê xerîtayêka seba xurtkerdişê têgêrayîşê sîyasî û neteweyî yê kurd Îran de bêrê vêşîkerdene. Kombîyayîşî de Hizba Komela Seyîd Bîrahîm Elîzade, Rêxistina Kurdîstan û Hîzba Komnunîstê Îranî, Cagirê Sekreterê Pêroyî yê Komela Şorişgiranê Zehmetkêşanê Kurdîstanê Îranî Omer Îlxanzade, Sekreterê Pêroyî yê Komela Zehmetkêşanê Kurdîstanî Reza Kebî, Sekreterê Sazumanîya Xebata Kurdîstanê Îranî Baba Şêx Husênî, Serekê Partîya Azadîya Kurdîstanî Husên Yezdanpena, Hemserekê PJAK’î Emîşr Kerîmî û Sekreterê Pêroyî yê Hizba Demokrat a Kurdîstanê Îranî Misteda Hîcrî amade bîyê.”
