Hemsereka Pêroyî ya DEM Partî Tulay Hatîmogullari dîyar kerd ke derheqê pêvînayîşê MHP’yî reyde do dima beyanatêko hîna hîra bidê. Cagirê Serekê Pêroyî yê MHP’yî Semîh Yalçin zî vat: “Pêvînayîşêko baş bî.”
Partîya Têduştî û Demokrasîyî ya Şaran (DEM Partî) vengdayîşo tarixî yê Rayberê Şarê Kurd Abdullah Ocalanî ra pey dest bi zîyaretê partîyanê sîyasîyan kerdbî. Na çarçewa de heyetê DEM Partî MHP reyde kom bî. Kombîyayîş Meclîsî de ame kerdene. Heyetê DEM Partî de Hemserekê Pêroyî yê DEM Partî Tulay Hatîmogullari û Tuncer Bakirhan, Serekwekîlê Meclîsî yê DEM Partî Sirri Sureyya Onder û Serekwekîla Grûba DEM Partî Gulistan Kiliç Koçyîgît ca girewt.
Heyetê DEM Partî hetê Cagirê Serekê Pêroyî yê MHP’yî Semîh Yalçin, Cagirê Serekê Pêroyî yê Hiqûq û Karûbaranê Weçinitişî ra Berpirsîyar Fetî Yildiz û Cagirê Serekê Pêroyî Îsmaîl Farûk Aksû ra ameyê pêşwazîkerdene. Silamdayîşî ra pey heyet derbasî salona pêvînayîşî bîyê.
Pêvînayîşî ra pey Tulay Hatîmogullari û Semîh Yalçin beyanat bîyê.
Ewil Tulay Hatîmogullari qisey kerd û vat: “Ma derheqê vengdayîşê birêz Abdullah Ocalan û MHP’yî û prosesî de pêvînayîş kerd. Ma do beyanatê xo yê hîna hîra qedîyayîşê pêvînayîşanê ewroyî ra pey bidê. Eke weşîya birêz Devlet Bahçelî ca de bîyêne o zî do ewro tewrê pêvînayîşî bibîyêne. Labelê seb ake weşîya ey nêverda, ma bi heyeto ke ey wezîfedar kerdo, înan reyde pêvînayîş kerd. Ma reyna ey rê silametîye wazenê.”
Semîh Yalçin zî wina vat: “Sey MHP ma do beyanatêk nêdê. La ez wazena şima tena nê bizanê, pêvînayîşêko xeylê baş bî.”
Heyetê DEM Partî do saete 14:00î de AKP’yî reyde pêvînayîş bikero.
