Cînîyanê Dêrsimijan derheqê “Pîre” de zanitena xo ajansê ma rê qesî kerd. ‘Heşarê xo vindêne Pîre nawa amê ha. Pîre ke amê lasêr yêno, şilîye, torge yena.’
Verî derheqê eyanî de teknolojî wina xurt nêbî. Şaran goreyê ceribnayîşanê xo rewşa eyanî ra zanitêne û goreyê aye tidarekê xo dîyêne. Goreyê ceribnayîşanê şarê ma yê se serran nameyê yew wextî ra “Pîre” yeno vatene. Hîrê rojî marte ra manenê hîrê rojî kî nîsane ra yenê girewtene, benê şeş rojî. Nê rojan ra vanê “Pîre.” Goreyê ceribnayîşî nê rojan de timî timî beno serd, vare varena, torge varena, lasêrî şonê. Aye ra pîlî vanê ke “mevajê zimistan qedîya, amnan ame, tidarekê xo bigê.”
Cînîyanê Dêrsimijan Fethîye Ataş û Zeynep Aslan kal û pîranê xo ra dewrê kulturî girewto û ardo heta roja ma. Derheqê Pîre de zanitena xo ajansê ma (AW) rê qesî kerd.
‘Pîlanê ma vatêne heşarê xo vindêne Pîre nawa amê’
Zeynep Aslan pîlanê xo ra çi heşnayo aye ma rê ana ziwan û wîna vana: “Pîlanê ma seba çi vatêne Pîre? Vatêne ke wexto ke hîrê rojî marte ra manenê hîrê rojî kî nîsane ra yenê girewtene, benê şeş rojî. Nê rojan ra vanê Pîre. Pîlanê ma vatêne ‘Beno germ, Pîre vana ‘Marte nuşta ro endî wisar o bîyo germ, ma xelesîyayîme ra, nêmirenîme endî.’ Vana ‘Germ o, endî ters nêmendo ez domananê xo bigî şêrî fekê derî de robar bikerî.’ Domananê xo gêna şona fekê çemî. Awe kena germ ke xo û domananê xo bişuyo lasêrî yenê. Laser tencik û mencikan terba adirî dano verê xo beno. Pîre domananê xo gêna dana verê çeperî ke lasêr nêbero. Tenê maneno varan vindeno beno weşîye, tîje vejîna. Rêna robar dana ser. Tenê maneno rêna torge varena, laser yeno, çi est o dano verê xo beno. Pîre rêna domananê xo bena binê çeperî de şeveknena. Aye ra vanê pîre ama dinya kerda torge, kerda vare, kerda lasêrî ver. Aye ra nê şeş rojan ra vanê Pîre. Wexto ke endî marte qedîyena û nîsane amêne, pîlanê ma timî timî vatêne ‘Heşarê xo vindêne Pîre nawa amê ha. Pîre ke amê lasêr yêno, şilîye, torge yena.’ Ma Pîre nîya zanîme.”
‘Marte hîrê rojî nîsane ra dên gêna’
Versîyonê Pîre yo ke daha zêde yeno zanitene Fethîye Ataş zî ma rê ê versîyonî kilmkî ana ziwan: “Jû kokime bîya vato ke ‘Marte vejîya bêçika mi de qina marte bo, mart vejîya bizêkê mi xelesîyayî ra.'” Beno serd vareno, torge varena, vare varena. Pîre bizêkan bena kena binê sepetî ra. Mart kî naye hesêneno, şono hîrê rojî nîsane ra dên gêno. Pîre bizêkan bena kena binê sepetî. Rojê şona ke bizêkî binê sepetî de pêrko merdê. Aye ra dime dar û ber keno ya, çîçek keno ya, torge û torjila vareno, çîçegî pêro kûnê bine. Pêrko yenê hard. Ma nayera “Pîre” vanîme.”
