PKK’yî derheqê vengdayîşê Abdullah Ocalan ê 27ê sibate de eşkerayîyêka newa daye û vat: “Ma hêvî kenê ke şertê xebatî yê azadî yê Rayber Apoyî awan bibê ke bieşko kongreya partî organîze bikero.”
Komîteya Rayberdişî ya PKK’yî bi eşkerayîyêk 1ê Gulane Roja Roşanê Karkeran fîraz kerd û derheqê prosesî de mesajê muhîmî dayî. Eşkerayîye wina ya:
“Ma 1ê Gulane reyna sey roja têkoşîn, paştîdayîş û yewîya sinifa karkeran pêşwazî kenê. 8ê Adare û Newroze ra dima 1ê Gulane de zî reyna şar, kedkar û karkerî do meydanan dekerê, têkoşînê demokrasîyî yê antîfaşîstî berz bikerê, seba cuya azade û rijîyayîşê faşîzmî biqîrê û seba komelê demokratîkî, azadîya cinîyan û ekolojîkî têkoşînî aver berê.
Nê esasî ser o sere de ê Rayber Apoyî ma 1ê Gulane pêro cinî û ciwanan, kedkar û karkeran, embazan, şarê ma yo welatperwer û dostanê xo rê fîraz kenê. Ma têkoşîn de pêro embazan rê serkewtiş wazenê, şexsê şehîdanê 1977î û şehîdanê ma Mehmet Karasungur, Mehmet Emîn Aslan û Ramazan Kaplanî de pêro şehîdanê 1ê Gulane yad kenê. Ma embazê xo yê erjîyaye û têkoşêrî Sirri Sureyya Onderî rê şîfaya xeyrîne wazenê.
1ê Gulane sey estareyî vernîya şaran roşnî keno
1ê Gulane mîraso tewr manadar û gandar ê sosyalîzmê reelî yo. Her çiqas zafê erjê sosyalîzmê reelî destî ra şîyê zî, raştîya 1ê Gulane hema zî sey estareyî vernîya şaran roşnî keno û îlham dano.
Şarê kurdî û Têgêrayîşê Azadîye yê Kurdîstanî bi xoverdayîşê tarîxî serkêşîya Rayber Apoyî de 8ê Adare û Newroze meydanan de manadar kerd. Şarê kurdî û Têgêrayîşê Azadîye yê Kurdîstanî 1ê Gulane de do têkoşînê azadîye û demokrasîyî berz bikerê û cuya manadare do vejê orte. Mefhumê Medenîyetê Demokratîkî yê Rayber Apoyî zî raştîya 1ê Gulane hîna bimana û raşt kerd.
Şarê ma û têgêrayîşê ma bingeyê Vengdayîşê Aştî û Komelo Demokratîkî yê Rayber Apoyî de 1ê Gulane pêşwazî kenê. Eşkera yo ke bê rêxistinî û bê demokrasî aştîye nêbena. Heta ke aştî nêra Kurdîstanî, Rojhelatê Mîyanênî de zî şer do nêqedîyo û aştî nêra. Çunke modernîteya kapîtalîste bi parçekerdiş û kolonîzkerdişê Kurdîstanî şikl girewt. Coka aştîya dinya û Rojhelatê Mîyanênî bi aştîya Kurdîstanî mumkîn a.
Komelo Demokratîk tewiro xozayî yê cewherê merdimîye îfade keno. Komelo demokratîk yeno manaya komelo ekolojîk û ekonomîk, komelê azadîgîrê cinîyan, komelo sosyalîst û komelo konfederalîst. Cinî û kurdî ke bindest ê nînan rê komelo demokratîk û aştî lazim ê. Naye ra cinî û ciwanî, şarê ma û dostê ma do hîna zaf ferasetê Vengdayîşê Aştî û Komelo Demokratîkî eşkera bikerê û çalakîyanê 1ê Gulane de ney bimojnê; paradîgmaya Modernîteya Demokratîke vila bikerê û ferasetê komelê demokratîkî yê enternasyonalîstî aver berê.
Ma wazenê Rayber Apo kongre îdare bikero
Seke rayapêroyî û şarê ma zanê, ma wayîrê Vengdayîşê Rayber Apoyî vejîyayê û nê di aşmanê peyênan de zî ma kerd ke goreyê ci têbigêrê. Ma eşkerayîyanê xo yê 1ê Adare û Newroze de zî nê nêzdîbîyayîşî eşkera kerd. Rixmê hêrişanê leşkerîyan û tênêgêrayîşê AKP’yî ma hema zî nêzdîbîyayîşê ma dewam keno. Ma kenê ke nêbê o teref ke prosesî herimneno û ma ecele zî nêkenê. Heyetê DEM Partî yê Îmraliyî eşkerayîyanê pozîtîfan dano. Ma eşnawenê ke Rayber Apo hêvîdar o û xebatanê xo domneno. La seba caardişê Vengdayîşê 27ê sibate hema zî çîyêko zelal çin o. Ma wazenê ke wa Rayber Apo bi hewayêko azad bixebitîyo, bibo wayîrê şertanê serbestan û kongre îdare bikero.
Ma wazenê şarê xo û dostanê xo reyna hişyar bikerê û venga înan bidê ke Vengdayîşê Rayber Apoyî bi serkewtişî bîyarê ca. Vengdayîşê 27ê sibate seba ke dewlete û îqtîdar çîyêk bidê nêame kerdene. Seba ke komel bibo demokratîk û azad ameyo kerdene. Aştî zî komelo demokratîk zî bi ney mumkin ê. Coka wa çew qesawet nêkero û çîyêkî nêpawo. Bi wesîleya 1ê Gulane wa her kes seferber bibo û seba averberdişê rêxistinî, yewîye û hişmendî bixebito.”
Kes nêeşkeno vernîya nê vurîyayîşî bigîro
Wa her kes mezgê xo û terzê cuya xo bivurno. Eşkerayo ke Vengdayîşê Rayber Apoyî her çî ra ver vengdayîşêko şorişê terzê cuye û mezgî yo. Wext wextê vurnayîşî yo. Êdî prosesêko winasîn est o. Çew nêeşkeno vernîya nê vurîyayîşî bigêro. Rayber Apoyî vurîyayîşê xo yo şorişgêrî kerdo. Nê esasî ser o PKK zî vurîyeno. Coka şarê kurdî, ciwanî û cinîyî do bivurîyê. 1ê Gulane û Menga Şehîdan a Gulane do bibê wesîleya nê vurîyayîş û vurnayîşî.
Nê esasî ser o ma reyna 1ê Gulane fîraz kenê. Ma şexsê Mehmet Karasungur, Hakî Karer û Hozan Mizgîne de pêro şehîdanê gulane bi rêz, minet û heskerdişî yad kenê. Ma venga şarê ma û dostanê ma yê demokratîkan danê ke her ca de 1ê Gulane fîraz bikerê!”
