Îdareyê Xoser ê Demokratîke yê Rojava vera hêrişanê çeteyanê HTŞ û SMO’yî seferberîye îlan kerdbî. Şarê Dêrsimîû Platformê Kede û Demokrasî yê Dêrsimî ewro vera nê hêrişan eşkerayî daye û eşkerayî de wina ame vatene: “Hêrişanê xo yê vera kurdanê Rojava cade bivindarnê!”
Îdareyê Xoser ê Demokratîke yê Rojava vera hêrişanê çeteyanê HTŞ û SMO’yî seferberîye îlan kerdbî. Her hetê Kurdîstan û dinya de vera nê hêrişanê qirkerdoxan şar û komelî reaksîyon mojnenê. Şarê Dêrsim û Platformê Kede û Demokrasî yê Dêrsimî zî ewro vera nê hêrişan eşkerayî daye. Eşkerayî nameyê platformî ser o Hemserekê Şarîstanî yê Dêrsimî Ozcan Ateşî wende. Eşkerayî ra dima PArlamenetera Dêrsîmî Ayten Kordu zî qisey kerd.
Eşkerayîye wina ya: Çapemenî û raya pêroyî rê
“Hukmatê demkî yê Şamî û çeteyê cîhadîstî yê girêdayeyê ey ganî hêrişanê xo yê vera Kurdanê Rojawanî cade bivindarnê!!!
Nê hêrişê rejîmê Şamî vera îdareyê seypê, demokratîk û xoserî ke Rojawan de bi pêşengîya cinîyan, bi xoverdayîşê şarî ame viraştene, tehdîtêko gird ê. Nê hêrişî; hedefgirewtişê yew rêxistinbîyayîşê komelkî yê ke cinî tede kerdox ê, şarê kurdî rê şerêk yeno ferzkerdene û bi naye qesdkerdişê ameyoxê Sûrîye yê. Hêrişê ke rojanê peyênan de dewam kenê, rasterast sîvîlan hedef gênê; sere de cinî û domanî heqê bi desan însanan ê cuye binpay kenê.
Nê hêrişê ke hetê hêzanê girêdayeyê Hukmatê Demkî yê Şamî ra yenê ramitene, tena polîtîkaya şîdetî ya vera şarê kurdî nîya; eynî wext de hêrişê vera cigêrayîşê çareserîya demokratîke ke bi bingeyê seypêbîyayîşê şaran û îradeyê pîyaciwîyayîşî yeno waştene ke Sûrîye de bêro awankerdene, û hêrişê vera tecrubeyanê îdareyê xoserî yê demokratîkî yê Rojawanî ke bi têkoşînê şaran o hempar şekil girewto. Nê hêrişê ke kurdan hedef gênê, tena ewro ney, wazenê ameyoxê Sûrîye de îhtîmalê pêameyîşanê sîyasî û zereyî zî wedarê. Coka nê serebûdî hetê îdareyê Şamî ra zî têkilîyê ke kurdan reyde yenê ronayene, yenê manaya şikîyayîşî.
Muzakereyê ke Parîs de bi nameyê ameyoxê Sûrîye û yewbîyayîşê herême ameyî kerdene û Fransa, Amerîka, Îsraîl, Tirkîya û Qralîyetê Yewbîyaye rasterast yan zî nerasterast beşdarê ci bîyî, nê hêrişanê vera şarê kurdî ra cîya nîyê. Wexto ke îradeyê pîyaciwîyayîşê şaranê Sûrîye masa ser o nêro temsîlkerdene, cografyaya ke tede ciwîyenê, yena kerdene babeta bazarîye. Dîplomasîya ke Parîs de ameya ramitene, reyna mojnaye ke îradeyê cuya seypêyîya kurdan hema zî babeta bazarî ya, koçkerdişê bi zorî sey metodêko tasfîyekerdişî yeno qebulkerdene û modelê demokratîk ê herême hêzanê globalan reyde pê nêyeno û coka hende yeno hedefgirewtene.
Îqtîdar bi behaneyê tehdîdê terorî yê vera Tirkîya îdîa keno ke yewbîyayîşê herême yê Sûrîye paweno labelê piştîdayîşê Hukmatê Demkî yê Şamî û çeteyanê cîhadîstan ke heqanê kêmîneyanê Sûrîye nêhesibnenê, rewşêk nîya ke bêra qebulkerdene. Êyê ke îdîa kenê ke yewbîyayîşê herême yê Sûrîye pawenê, hetê Îsraîlî ra îşxalê girê Golanî hêrîş nêvînenê yewbîyayîşê herême nêpawenê, no eşkera mojneno ke mesela eleqedarê yewbîyayîşê herême yê Sûrîye nîya. Ma bala ancenê ke ganî na xeletîye ra lez bêro agêrayene.
Bi na rewşa ke Sûrîye de ciwîyena bi taybetî zindanê ke DAÎŞ’ijî tede yê û kampê ke binê kontrolê Îdareyê Xoserî yê Rojawanî de bî, badê ke çeteyan hêriş kerd DAÎŞ’ijî ameyî veradayene.
Ma sey Platformê Kede û Demokrasî yê Dêrsimî, hêrişanê vera şarê kurdî yê Rojawanî, polîtîkayanê koçkerdişê bizorî û nê konseptê şerî ke îradeyê şaran nêhesibnenê, red kenê. Ma zanê ke dinya de her ca de vera şer û pêkewtişan yew çareserîya raştikêne haştîyêka birumet a û seba naye ma raya pêroyî rê îlan kenê ke ma têkoşînê xo dewam kenê.”
‘Zîhnîyetê IŞID’î qirkerdena Dêrsîmî de zî bî’
Wekîla Dêrsimî Ayten Korduye qiseykerdişê xo de bineyê zîhnîyetî xêz kerd û wina va: ”IŞID teyna Sûrîya de nîyo, ma zîhnîyetê IŞIDî qirkerdena Dêsîmî de zanîme. Seserrîyo Kurdî çar leteyê û şima seserrîyo kurdan qir kenê. Dewleta tirke kurdan inkar kena. Ma kurd û qomê elewî zanîme ke teyna yew raye esta, a kî raya demokrasîya. Rojavayî mîyanê rojhilatê mîyanênî de raya xo dîya, aştîye vazenê. Qomê rojawayî pêro pîya jû ca de rê. Dinya naye bizano ke Rojava teyna nîyo. Qomê Dêrsimî hetê şarê Rojavayî de ro.”
